Kayonza: Perezida Kagame yifatanije n’abaturage batunganya ibikorwaremezo

Perezida wa Repubulika, Paul Kagame, n’umuryango we, kuri uyu wa Gatandatu tariki ya 30 Mata 2016, bifatanije n’abaturage bo mu karere ka Kayonza, mu muganda ngaruka kwezi, batunganya umuhanda yubakwa mu mujyi wa Kayonza.

Hatunganjijwe Umuhanda n’inzira z’amazi, mu murenge wa Mukarange mu kagari ka Bwiza, mu rwego rwo gushyigikira igishushanyo mbonera cy’Umujyi wa Kayonza, uzubakwamo imihanda ingana na Kilometero 13, hakaba hamaze gutunganywa Kilometero umunani.

Nyuma y’umuganda, Perezida Kagame yibukije abaturage b’Akarere ka Kayonza, kubyaza umusaruro imihanda minini inyura muri ako karere ihuza u Rwanda n’ibindi bihugu, bakarushaho kongera ubuhahirane n’abaturage babiturukamo.

“…ibyo bivuze ko iyo mihanda abayikoresha ari abava Uganda, ari abajya Uganda, ari abava muri Tanzania, abo bose bakwiye kuba babikora mu nyungu zabo, mukagira ibyo mucuruza mujyana muri ibyo buhugu cyangwa muvanayo bigahurira hano i Kayonza, aho imihanda ihurira… ibyo ni amahirwe.” Perezida wa Repubulika, Paul Kagame.

Perezida Kagame yasabye abaturage kurinda ibikorwaremezo byubatswe, birinda gusatira imbago z’imihanda.

Umukuru w’igihugu kandi yababwiye ko ibikorwa remezo bafite cyane cyane imihanda bakwiye kuyibungabunga bareka kuyigabiza basatarira imbago zayo.

Agira ati “Hari abo usanga bahinga bakageza no mu muhanda cyangwa bakubaka bakageza no mu muhanda. Ntabwo dushaka ko hari umuntu tuzasenyera yubatse mu muhanda, umuhanda ntabwo ari uwo kubakamo.”

Yabasabye ko bakwiye kwitonda kuko iyo umuntu akoze neza ibyo asabwa ntawe usubira inyuma ngo amusenyere.

Panorama