Abanyamuryango ba FPR–Inkotanyi mu karere ka Ngoma mu ntara y’Iburasirazuba biyemeje gukomeza guteza imbere abahatuye bashyigikira abakandida depite ba FPR n’indi mitwe ya politike bafatanyije.
Ibi babyiyemeje ku wa kabiri tariki ya 14 Kanama 2018 mu murenge wa Zaza ahatangirijwe ibikorwa byo kwamamaza abakandida depite ba FPR –Inkotanyi n’indi mitwe ya politike bifatanyije mu guhatanira imyanya mu nteko ishinga amategeko y’u Rwanda, mu matora ateganyijwe mu kwezi gutaha kwa Nzeri.
Mu buhamya bwe, Habyarimana Pierre, utuye mu kagari ka Nyagatugunda, Umurenge wa Zaza mu karere ka Ngoma, yasabye abandi baturage gutora no gushyigikira FPR–Inkotanyi kubera ibikorwa by’iterambere yabagejejeho.
Uyu munyamuryango avuga ko kuba ubu ari umuhinzi-mworozi ntangarugero aho atuye abikesha Umuryango FPR. Agira ati “Ndashima FPR. Nari mu ngabo zatsinzwe, ndataha. Ngeze mu giturage nari mfite isoni, ariko banyakiriye neza nk’umwana wabo. Nshaka ukuntu naba umugabo nakwiteza imbere, ninjira mu buhinzi n’ubworozi. Ubu naguze moto kubera ubuhinzi bw’urutoki. Ndabasaba gutora FPR rero kugira ngo dukomeze iterambere turimo.”
Nyabuhoro Anastasie, na we ni umunyamuryango wa FPR Inkotanyi utuye mu kagari ka Nyagasozi, Umurenge wa Zaza. Avuga ko ashimira Umuryango FPR Inkotanyi kuba warabagejejeho ibikorwa binyuranye by’iterambere, ariko cyane cyane gahunda ya Girinka n’ubwisungane mu kwivuza, abona agomba kongera gutora FPR kugira ngo bikomeze kwiyongera.
Agira ati “Badukuye habi, baduhaye Girinka, baduha amafaranga y’ingoboka. Ni yo mpamvu nanjye naje gushyigikira abakandida ba FPR kugira ngo bazakomeze kudufasha badukorera ubuvugizi.”
Umuyobozi w’Umuryango FPR Inkotanyi ku rwego rw’intara y’Iburasirazuba, Mufulukye Fred, wifatanyije n’abanyamuryango bo mu karere ka Ngoma muri uyu muhango, yabwiye imbaga yari ikoraniye ku kibuga cy’umupira cya TTC Zaza ko basabwa kuzashyigikira abakandida –depite ba FPR Inkotanyi.
Uyu muyobozi anavuga ko intara y’Iburasirazuba igomba kuzaza ku isonga mu gutora neza, yaboneyeho gusaba abanyamuryango kwitwara neza. Agira ati “Tuzakomeza gushyigikira Umuryango, ndabasaba kandi kwitwara neza muri iki gihe cyo kwiyamamaza n’igihe cyo gutora. Muzitabire mujyane n’umuhigo wo kuba aba mbere mu matora no gutora neza.”
Kwizera Christella, intumwa y’Ubunyamabanga bukuru bwa FPR Inkotanyi, yashimiye abanyamuryango uruhare bagize muri manda y’abadepite ishojwe anabasaba gutora FPR n’amashyaka yayisunze kugira ngo ibikorwa by’amajyambere bikomeze.
Agira ati “Turabashimira uruhare mwagize mu matora aheruka. Imyaka itanu ije, hazihutishwa iterambere rishingiye ku bukungu, gushimangira imiyoborere myiza. Birasaba rero uruhare rwa buri wese mu gushyigikira Umuryango.”
Ibikorwa byihutirwa abatuye i Zaza bijejwe harimo kubakirwa uruganda rutunganya inanasi no gukora imihanda ihuza utugari.
Mu gutangiza ibikorwa byo kwamamaza abakandida depite ba FPR Inkotanyi n’amashyaka bafatanyije i Zaza, herekanywe abakandida depite babiri Iphigenie Mukandera na Ndagijimana Leonard.
Mu matora y’abadepite ya 2018, FPR Inkotanyi yifatanyije n’imitwe ya politike itandatu irimo PDI, PSR, PDC, PPC, UDPR na PSP.
Nkurunziza Theonetse/Ngoma
Mufulukye Fred, Chairman wa FPR mu ntara y’Iburasirazuba yari ahari (Ifoto/Theoneste N.)
Abahagarariye PDC bari baje kwifatanya na FPR INKOTANYI (Ifoto/Theoneste N.)
Abanyamuryango ba FPR Inkotanyi mu bikorwa byo kwiyamamaza i Ngoma
Abanyamuryango ba FPR Inkotanyi mu bikorwa byo kwiyamamaza i Ngoma
Abanyamuryango ba FPR Inkotanyi n’ab’imitwe ya Politiki bifatanyije bari mu bikorwa byo kwiyamamaza mu karere ka Ngoma
Abanyamuryango ba FPR Inkotanyi n’ab’imitwe ya Politiki bifatanyije bari mu bikorwa byo kwiyamamaza mu karere ka Ngoma
Ahabereye ibirori byo kwamamaza abakandida ba FPR Inkotanyi mu karere ka Ngoma, mu murenge wa Zaza
