Raoul Nshungu
Paris Saint-Germain yasezereye Arsenal iyitsinze ibitego 2-1 bikaba 3-1 mu mikino yombi ihita iyikura muri UEFA Champions League.
Uyu mukino wo kwishyura wa ½, wabaye mu ijoro ryo ku wa Gatatu, tariki ya 7 Gicurasi 2025 i Parc de Princes i Paris mu Bufaransa.
PSG yawugiyemo ifite impamba y’igitego cyatsindiye mu Bwongereza, mu gihe The Gunners yasabwaga ibitego bibiri.
Iminota 27 yari ihagije ngo Abafaransa bongere ikinyuranyo cy’ibitego nyuma y’uko Umunya-Espagne, Fabián Ruiz afunguye amazamu amaze gutegeka neza umupira wari uturutse kuri kufura maze Umunya-Ghana, Thomas Partey wa Arsenal ananirwa kuwuvanaho neza.
Mu minota 35, Arsenal yasatiraga ishaka igitego cyo kwishyura ariko kirabura. Igice cya mbere cyarangiye Paris Saint-Germain yatsinze Arsenal igitego 1-0.
The Gunners yongeye gutangirana imbaraga n’igice cya kabiri ariko kureba mu izamu bikaba ikibazo.
Ku munota wa 67, Achraf Hakim yateye ishoti, Myles Lewis-Skelly awukoraho n’akaboko, umusifuzi atanga penaliti nyuma yo kwifashisha VAR.
Yahise iterwa na Vitihna ariko umunyezamu David Raya umupira awukuramo awushyira muri koruneri.
Ikipe y’i Paris yakomeje kotsa igitutu iyo mu Bwongereza, maze ku munota wa 72, Hakim atsinda igitego cya kabiri, ku mupira yahawe na Ousmane Dembélé wari ukinjira mu kibuga.
Nyuma y’iminota ine gusa, William Saliba yateye umupira muremure, Leandro Trossard awurwanira na Marquinhos awutanga kwa Bukayo Saka atsinda igitego cya mbere cya Arsenal.
Amakipe yombi yakomeje guhanga ariko birangira itsinzi n’itike yo kujya ku mukino wa nyuma itashye I Paris.
Ibi bivuze PSG isanze Inter Milan yo mu Butaliyani ku mukino wa nyuma, Inter yari yasezereye FC Barcelona ku wa 6 Gicurasi 20255, umukino wa nyuma uteganyijwe ku ya 31 Gicurasi 2025 i Munich mu Budage.
