Paul Rusesabagina yagejejwe i Kigali

Amakuru yatambutse ku rubuga rw’Urwego rw’Igihugu rw’Ubugenzacyaha (RIB) bwagaragaje Paul Rusesabagina ari mu maboko yabwo kandi yambaye amapingu n’ikositimu y’umukara ndetse n’agapfukamunwa.

Rusesabagina yeretswe itangazamakuru muri iki gitondo, aho RIB yatangaje ko uyu mugabo yafashwe biturutse ku bufatanye bw’u Rwanda n’amahanga.

RIB ibinyujije kuri Twitter yayo yavuze akekwaho kurema no kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni, irimo MRCD na PDR-Ihumure, ikorera mu bice bitandukanye mu karere no mu mahanga.

Rusesabagina asohoka mu modoka ya RIB ishinzwe gutwara abafashwe bakekwaho ibyaha (Ifoto/RIB)

Hari hashize igihe Rusesabagina ashyiriweho impapuro mpuzamahanga zisaba ko afatwa agashyikirizwa ubutabera kugirango abazwe ku byaha bikomeye aregwa birimo iterabwoba, gutwika, ubushimusi n’ubwicanyi byakorewe abaturage binzirakarengane, b’abanyarwanda mu duce dutandukanye tw’u Rwanda.

Utwo duce turimo Nyabimata mu Karere ka Nyaruguru ahabaye ibitero muri Kamena 2018 no muri Nyungwe mu Karere ka Nyamagabe mu Kuboza 2018.

Rusesabagina yerekwa itangazamakuru i Kigali (Ifoto/RIB)

Ubushinjacyaha butangaza ko Rusesabagina ubu acumbikiwe kuri Sitasiyo ya Police ya Remera mu gihe hagikorwa iperereza ku byo akurikiranweho hakurikijwe ibiteganywa n’amategeko y’ikurikirana byaha.

Rusesabagina Paul ni umuyobozi w’impuzamiryango MRCD, ishamikiyeho umutwe witwaje intwaro wa FLN wakunze kugaba ibitero mu nkengero z’ishyamba rya Nyungwe. Uwo mutwe wari ufite Nsabimana Callixte ‘Sankara’ nk’umuvugizi, na we ubu afungiwe mu Rwanda.

Panorama