Panorama Sports
Umunyarwandakazi, Niyonkuru Florence ukina imikino ngororamubiri yo gusiganwa ku maguro, akomeje kwandika amateka, aho yongeye guhesha u Rwanda Umudari w’Umuringa mu mikino ya Shampiyona y’Isi ya 2026.
Iyi mikino yiswe ‘World Athletics Road Running Championships’, itegurwa n’Ishyirahamwe ry’Imikino yo gusiganwa ku maguru ku Isi (World Athletics) irabera mu Mujyi wa Copenhagen muri Danemark.
Ku Cyumweru, tariki ya 20 Nzeri 2026, abari muri iri rushanwa mu cyiciro cy’abagore, bakoze intera y’ibilometero 21 bingana na ½ cya Marato yose (Half Marathon).
Niyonkuru Florence, Emeline Imanizabayo na Ibishatse Angelique ni bo bahagarariye u Rwanda muri iri rushanwa.
Muri aba bose, Niyonkuru ni we witwaye neza akoresha isaha imwe, iminota itandatu n’amasegonda atanu, asiganwa na Agnes Jebet Ngetich wabaye uwa mbere na Veronica Loleo wabaye uwa kabiri, bombi bo muri Kenya.
Niyonkuru w’imyaka 25 aherutse kuba uwa gatatu mu Mikino ya Commonwealth, aho yatwaye umudari w’Umuringa mu gusiganwa mu ntera ya metero 10.000, ari na wo wa mbere igihugu cyari kibonye muri iyi mikino.
Andi mateka aheruka kwandika ni ukwegukana umudari wa Zahabu mu gusiganwa metero ibihumbi 10 muri ‘TCS World 10K Bengaluru’ yabereye mu Buhinde.
