Minisiteri y’ububanyi n’amahanga y’u Rwanda yatangaje rwoherereje Mozambique toni 20 z’ibiribwa n’imiti byo kuyigoboka kubera imyuzure yayishegeshe.
Kuri X hari itangazo ry’iyo Minisiteri rigira riti: “Guverinoma y’u Rwanda yoherereje Mozambique toni 20 zirimo ibiribwa, imiti n’ibindi bikoresho byo kugoboka iki gihugu cyibasiwe n’imyuzure yahitanye abaturage, ituma abandi bava mu byabo.”
Mu mwaka wa 2025, u Rwanda rwoherereje Gaza indi nkunga ya toni 40 z’ibiribwa n’imiti byo gufasha abaturage ba Gaza bari bafite ibibazo byo kubona imiti n’ibiribwa byo kubaramira muri iki gihe kibakomereye.
U Rwanda na Mozambique bifitanye umubano watangiye mu mwaka wa 1990.
Wakomeje gukura ndetse mu mwaka wa 2021, inzego z’umutekano z’u Rwanda n’iza Mozambique zatangiye gukorana mu kurwanya ibikorwa by’iterabwoba mu Ntara ya Cabo Delgado yari yarahungabanyijwe bikomeye n’umutwe wa Ansar al Sunnah.
