Isoko mpuzamahanga ry’ibikomoka kuri peteroli rikomeje kwerekana impinduka nziza nyuma y’uko Amerika na Iran byumvikanye ku guhagarika imirwano by’agateganyo. Ibi byatumye ibiciro byari byarazamutse cyane mu mezi ashize bitangira gusubira ku rwego rwariho mbere y’uko amakimbirane hagati y’ibi bihugu afata indi ntera.
Kuri uyu wa 25 Kamena 2026, akagunguru ka peteroli idatunganyije kageze ku Madolari 72,48 y’Amerika, bikaba ari imwe mu mibare yo hasi yagaragaye kuva intambara yatangira.
Mu ntangiriro z’ayo makimbirane, nyuma y’uko Amerika na Israel bagabye ibitero kuri Iran, iki gihugu cyari cyafashe umwanzuro wo kubangamira urujya n’uruza rw’amato anyura mu Muhora wa Hormuz, inzira inyuzwamo igice kinini cya peteroli ijya ku masoko mpuzamahanga.
Icyo gihe ibiciro byari byarenze Amadolari 120 ku kagunguru, bituma n’ibiciro by’ubwikorezi n’ingendo bizamuka ku rwego rwo hejuru.
Amakuru yatangajwe n’Ikigo Kpler akurikirana ubwikorezi bwo mu nyanja agaragaza ko kuva hasinywa amasezerano y’agateganyo azamara iminsi 60, ubwato burenga 280 butwaye peteroli, gaz n’ifumbire bwongeye kunyura muri uwo muhora.
Kongera gufungura iyi nzira y’ingenzi byagaruye icyizere ku masoko mpuzamahanga, bituma ibiciro bya peteroli bigabanyuka.
Mu rwego rwo gukomeza kurinda umutekano w’ubwikorezi muri aka gace, Qatar na Pakistan zikomeje gukorana bya hafi na Amerika na Iran mu gushaka ibisubizo birambye byafasha gukomeza urujya n’uruza rw’ibicuruzwa ku isi.
