Minisitiri w’Intebe w’u Rwanda, Dr. Justin Nsengiyumva, yasabye ibihugu bya Afurika kuva ku mihigo n’amasezerano yanditse bikibanda ku bikorwa bifatika, by’umwihariko mu guteza imbere serivisi z’amazi, isuku n’isukura.
Ibi yabivugiye i Kigali kuri uyu wa Kabiri tariki ya 18 Kanama 2026, ubwo yatangizaga ku mugaragaro Inama Nyafurika yiga ku miyoborere n’iterambere ry’urwego rw’amazi, isuku n’isukura.
Iyi nama yatangiye ku wa 17 Kanama ikazageza ku wa 21 Kanama, ikaba yahuje abarenga 1,000 barimo abayobozi, inzobere, abashoramari, ibigo by’imari n’abafatanyabikorwa mu iterambere baturutse mu bice bitandukanye bya Afurika no hanze yayo.
Ihuriro ry’iyi nama rije mu gihe Umuryango wa Afurika Yunze Ubumwe wagennye umwaka wa 2026 nk’umwaka wo kwibanda ku mazi n’isuku. Abitabiriye barimo kuganira ku buryo imihigo y’ibihugu n’umugabane muri uru rwego yahinduka ibikorwa bifatika bigera ku baturage.
Amazi meza n’isuku ni serivisi z’ibanze
Mu ijambo rye, Minisitiri w’Intebe Nsengiyumva yagaragaje ko amazi meza, isuku n’ibikorwa remezo bifasha abaturage bitagomba gufatwa nk’ibyiyongera ku iterambere, ahubwo ko ari serivisi z’ibanze abaturage bakwiye kubona mu buryo bunoze.
Yagize ati “Serivisi nziza zitangwa zigomba kwita ku byifuzo n’ibikenewe n’abaturage, birimo amazi meza, kubona serivisi z’ibanze, imihanda ibahuza n’amasoko, serivisi z’ubuvuzi, ndetse n’uburezi bufite ireme ku bana babo.”
Minisitiri w’Intebe yavuze ko gushyira abaturage ku isonga no kubagezaho serivisi zinoze ari kimwe mu byafasha ibihugu kugera ku ntego z’iterambere.
U Rwanda na rwo rufite intego yo kugeza amazi meza ku baturage bose bitarenze mu 2030, mu rwego rwo kuzamura imibereho yabo no guteza imbere ubukungu.
Afurika irashaka icyuho kiri hagati y’imihigo n’ibikorwa
Muri iyi nama, abayobozi n’impuguke barimo kurebera hamwe impamvu, nubwo Afurika imaze imyaka ishyira imbere gahunda zo kugeza amazi meza n’isuku kuri bose, hakomeje kubaho itandukaniro hagati y’ibyemezwa n’ibikorwa bigera ku baturage.
Ibiganiro kandi biribanda ku miyoborere y’urwego rw’amazi n’isuku, imikoreshereze inoze y’ingengo y’imari, kubazwa inshingano, kongerera ubushobozi abakozi ndetse no guteza imbere udushya.
Harimo kandi kurebera hamwe uburyo urubyiruko rwagira uruhare mu guhanga ibisubizo by’ibibazo biri muri uru rwego ndetse n’uburyo bwo gukurura abashoramari n’ibigo by’imari mu mishinga ijyanye n’amazi, isuku n’isukura.
Inama y’i Kigali ni imwe mu mbaraga Afurika iri gushyira mu gushaka uburyo imihigo yafashwe ku rwego rw’umugabane yahinduka ibikorwa bifatika kandi bigatanga umusaruro ugaragarira abaturage.
