Umunyamabanga Mukuru w’Urwego rw’Ubugenzacyaha mu Rwanda (RIB), Pacifique Kabanda, yasabye ko ibihugu byongera ubufatanye mu guhangana n’ibyaha by’uburiganya bikorerwa kuri internet n’icuruzwa ry’abantu, avuga ko ibyo byaha bifitanye isano.
Ibi yabigarutseho mu Nama Mpuzamahanga yiga ku kurwanya ubwambuzi bukorerwa kuri internet yabereye i Phnom Penh muri Cambodia, kuva ku wa 23 kugeza ku wa 24 Nzeri 2026.
Iyi nama yari ifite insanganyamatsiko igira iti: “Dufatanye mu guca uruherekane bw’ubwambuzi bukorerwa kuri internet”, ihuza abahagarariye Guverinoma z’ibihugu bitandukanye, imiryango mpuzamahanga n’inzego zishinzwe umutekano.
Mu bitabiriye harimo ibihugu nka Australia, Brazil, Cambodia, u Bushinwa, u Bufaransa, u Buhinde, Indonesia, u Buyapani, Koreya y’Epfo, Laos, Malaysia, Myanmar na Nigeria. Hari kandi abaturutse muri Pakistan, Philippines, u Rwanda, Singapore, Timor-Leste, Uganda, Vietnam n’u Bwongereza.
Inzego mpuzamahanga zirimo Ibiro by’Umuryango w’Abibumbye bishinzwe Kurwanya Ibiyobyabwenge n’Ibyaha (UNODC) na Polisi Mpuzamahanga (INTERPOL) na zo zari zihagarariwe.
Abitabiriye inama baganiriye ku buryo bwo gukaza ingamba zo kurwanya ibyaha bikorerwa kuri murandasi, kunoza ihererekanyamakuru no kongera imikoranire hagati y’ibihugu mu gukurikirana no gusenya imiyoboro y’abagizi ba nabi.
Pacifique Kabanda yashimiye Cambodia ku kwakira iyi nama, agaragaza ko ibiganiro nk’ibi ari ingenzi mu gushimangira ubufatanye mpuzamahanga mu guhangana n’ibyaha byambukiranya imipaka, birimo n’icuruzwa ry’abantu.
Yavuze ko kuba uburiganya bukorerwa kuri internet n’icuruzwa ry’abantu bishobora guhuzwa n’imiyoboro imwe y’abagizi ba nabi, bituma kurwanya ibyo byaha bisaba imbaraga zihuriweho n’ibihugu bitandukanye.
Kabanda yasabye ko amakuru ajyanye n’ibi byaha ajya asangizwa inzego zibifiteho ububasha mu bihugu birebwa n’ikibazo, ndetse hakongerwa iperereza rihuriweho.
Yagaragaje ko ubwo buryo bushobora gufasha inzego z’umutekano gukurikirana udutsiko tw’abagizi ba nabi, kubisenya no kurushaho kurinda abantu bashobora kugwa mu mutego w’icuruzwa ry’abantu cyangwa uburiganya bwo kuri internet.
Kabanda Pacifique Umunyamabanga Mukuru muri RIB
