Mu mukino ukomeye wa gatanu mu ya kamarampaka ya Shampiyona ya Basketball aya makipe ahatana, APR BBC yatsinze Patriots BBC amanota 80-78. Ni umukino wabaye ku mugoroba wo ku wa 20 Nzeri 2024, muri BK Arena.
Amakipe yombi yinjiye ikibuga anganya imikino kuko buri kipe yari ifite imikino ibiri yatsinze. Umukino uheruka wari wegukanwe na Patriots. Uw’uyu munsi wari ishiraniro buri kipe yawushakaga.
Patriots yayoboye umukino kugeza aho yagize amanota 62 kuri 58 ya APR BBC, ariko Patriots ntibyayihiriye kuko APR BBC yakuyemo ikinyuranyo bigera aho amakipe yombi anganya amanota 67-67.
Habura umunota n’igice ngo umukino urangire, amakipe yombi yari agihatana ku buryo yanganyaga n’ubundi amanota 74-74. Umukino warangiye, APR BBC yatsinze Patriots BBC amanota 80-78.
Umukino wa gatandatu, uzaba kuri iki Cyumweru tariki 22 Nzeri 2024 muri BK Arena.
