Amakipe ya APR WBBC na REG WBBC yageze ku mukino wa nyuma w’Irushanwa Rwanda Cup 2024 mu cyiciro cy’Abagore.
Biteganyijwe ko umukino wa nyuma hagati ya REG WBBC na APR WBBC n’uwo guhatanira umwanya wa gatatu uzahuza IPRC Huye WBBC na Kepler WBBC muri Rwanda Cup 2024, izaba ku wa Gatanu, tariki 20 Nzeri 2024.
APR WBBC yatsinze Kepler WBBC amanota 59-57 mu gihe REG WBBC yasezereye IPRC Huye WBBC iyitsinze amanota 96-64 mu mikino ya ½ yakiniwe muri BK Arena kuri uyu wa Gatatu, tariki ya 18 Nzeri 2024.
Mu mikino ya Rwanda Cup 2024, IPRC Huye WBBC yitwaye neza itsinda APR WBBC mu mikino y’amatsinda (77-74), ikuraho agahigo Ikipe y’Ingabo z’igihugu yari ifite aho yari itaratakaza umukino n’umwe mu mwaka wa 2024. Ni umukino wabaye tariki 2 Kamena 2024.
IPRC Huye WBBC yazamutse iyoboye Itsinda A mu gihe REG WBBC yabaye iya kabiri mu Itsinda B, inyuma ya Kepler W BBC yazamutse ari iya mbere kuko yayitsinze ku manota 69-60.
Umukino wa mbere wa ½ wahuje IPRC Huye WBBC na REG WBBC, warangiye Ikipe ya Sosiyete y’Igihugu ishinzwe Ingufu, itsinze amanota 96-64.
REG WBBC yitwaye neza mu duce dutatu kuko yadusoje iri hejuru ya IPRC Huye. Aka mbere karangiye ifite amanota 24-13 mu gihe aka kabiri yagatsinze ku manota 21-10.
Mu gace ka gatatu, IPRC Huye WBBC yigaranzuye REG WBBC igatsinda ku manota 22-20 mu gihe aka nyuma kihariwe n’Ikipe y’Ingabo yatsinze amanota 31-19.
Umukino muri rusange warangiye REG WBBC yegukanye intsinzi ku manota 96 kuri 64 ya IPRC Huye WBBC.
Muri uyu mukino, Uwimpuhwe Henriette uzwi nka Kamoso wa IPRC Huye ni we winjije amanota menshi, 27, mu gihe Umunezero Ramla wa REG WBBC yatsinze amanota 17.
Mu wundi mukino wari ishiraniro, Kepler WBBC yacakiranye na APR WBBC, zishakamo isanga REG WBBC ku mukino wa nyuma.
APR WBBC ni yo yatsinze agace ka nyuma ku manota 13 kuri 7 ya Kepler WBBC. Mu gace ka kabiri, iyi Kipe ya Kaminuza ya Kepler yakegukanye ku manota 12 ku icyenda y’Ikipe y’Ingabo.
Kepler WBBC yari mu mukino neza yanatwaye agace ka gatatu ku manota 20-16 mu gihe yatsinzwe aka kane irushwa amanota atatu [18-21].
Nyuma y’uduce tune, APR WBBC yegukanye intsinzi ku manota 59 kuri 57 ya Kepler WBBC.
Abakinnyi bitwaye neza muri uyu mukino bayobowe na Uwimpuhwe Henriette wa Kepler WBBC, watsinze amanota 24 ndetse na Kantore Sandra ukinira APR WBBC wabonye amanota 19.
