Minisitiri w’Intebe Dr. Justin Nsengiyumva yavuze ko u Rwanda rwubatse uburyo bw’ubuzima bushobora kwifashishwa mu gutahura no guhangana n’indwara z’ibyorezo, asaba ko ibihugu bishora imari mu kwitegura mbere y’uko ibibazo by’ubuzima bibaho.
Ibi yabivugiye i New York mu bikorwa biherekeje Inteko Rusange ya 81 y’Umuryango w’Abibumbye, mu gihe amahanga yitegura inama yo ku rwego rwo hejuru izibanda ku gukumira, kwitegura no guhangana n’ibyorezo.
Dr. Nsengiyumva yavuze ko u Rwanda rumaze kubona akamaro ko kugira gahunda z’ubuzima zikomeye, cyane cyane mu guhangana n’icyorezo cya Marburg cyagaragaye mu 2024.
Yasobanuye ko mu gihe cya Marburg, abakozi b’ubuzima bwo mu baturage, laboratwari, gahunda zo gukurikirana indwara n’ibitaro by’igihugu byahise byifashishwa mu guhangana n’icyo cyorezo. Abakozi b’ubuzima basuzumye abantu barenga miliyoni 9.5 mu gihugu, bituma icyorezo kigenzurwa mu gihe cy’amezi atatu.
Minisitiri w’Intebe yavuze ko ibi bigaragaza ko ubushobozi bwubakwa buri munsi bushobora kugira uruhare rukomeye mu gihe hadutse icyorezo gishya.
Ati: “Kwitegura, mu bunararibonye bwacu, si ubushobozi bwihariye bubikwa gusa ngo buzakoreshwe mu bihe by’ibibazo. Ni imbaraga zisanzwe za gahunda y’ubuzima ziba zihari ku munsi zikenewe.”
Dr. Nsengiyumva yavuze kandi ko u Rwanda rukomeje kongera ubushobozi bwo gukumira indwara zishobora kuva ku nyamaswa zikagera ku bantu, binyuze mu buryo buzwi nka One Health, bukomatanya ubuzima bw’abantu, amatungo n’ibidukikije.
Yagaragaje ko ubufatanye na Pandemic Fund buri gufasha u Rwanda gushimangira ubu bushobozi, harimo no kubaka Laboratwari y’Igihugu y’Ibizamini by’amatungo, hagamijwe gutahura vuba indwara z’inyamaswa zishobora kugira ingaruka ku bantu no kugabanya kwishingikiriza kuri laboratwari zo mu mahanga.
Minisitiri w’Intebe yanagarutse ku kibazo cy’inkunga mpuzamahanga zigenewe ubuzima, avuga ko kwitegura ibyorezo bisaba amafaranga ahoraho kandi ateganyijwe. Yavuze ko gutegereza ko icyorezo gitangira kugira ngo hakusanywe umutungo wo guhangana na cyo bishobora gutuma ibihugu byishyura igiciro kirenze icyo byari gukoresha mu kwitegura.
Ati: “Igikwiye guhinduka ni ukuva ku mihigo ikorerwa mu nama mpuzamahanga tukagera ku ishyirwa mu bikorwa dushobora kubona, gupima no gukomeza ku rwego rw’igihugu.”
Dr. Nsengiyumva yavuze ko u Rwanda ruzakomeza gushora imari mu bikorwa byo gutahura no guhangana n’ibyorezo, ariko ashimangira ko ibihugu bidashobora kubikora byonyine. Yasabye ubufatanye n’ibihugu bituranye, imiryango yo mu karere ndetse n’abafatanyabikorwa mpuzamahanga, cyane ko indwara zishobora kurenga imipaka kandi zikihuta bitewe n’imihindagurikire y’ikirere, ingendo z’abantu n’inyamaswa ndetse n’ihindagurika ry’imikoreshereze y’ubutaka.
Yasoje ashimangira ko nubwo isi idashobora kumenya mbere indwara nshya izaduka, aho izaturuka cyangwa umuvuduko izakwizaho, ishobora kwitegura kugira ngo igihe izagaragara ibihugu bitazayakira bitunguranye.
