Ikipe ya FC Barcelona yongeye kwegukana igikombe cya Shampiyona ya Espagne, La Liga, ku nshuro ya kabiri yikurikiranya. Ni nyuma yo gutsindira mukeba wayo Real Madrid ibitego 2-0 mu mukino ukomeye wabaye mu ijoro ryo ku wa 10 Gicurasi 2026.
Barcelona yinjiye muri uyu mukino izi neza ko intsinzi yari kuyihesha guhita yegukana igikombe mbere y’uko shampiyona irangira, kandi niko byaje kugenda nyuma y’uko Ferran Torres na Marcus Rashford batsinze ibitego byahesheje iyi kipe amanota atatu y’ingenzi.
Uyu mukino waranzwe no kwiharira umupira no kurema uburyo bwinshi bwa Barcelona, aho abakinnyi bayo bagaragaje urwego rwo hejuru kurusha abo ku ruhande rwa Real Madrid. Nubwo umukino warangiye ari ibitego bibiri gusa, Barcelona yabonye andi mahirwe menshi atabyajwe umusaruro na Robert Lewandowski, Ferran Torres ndetse na Rashford wari ukomeje kwitwara neza muri iyi minsi.
Iyi ntsinzi yahise itandukanya Barcelona na Real Madrid amanota 14, ibintu byatumye bishoboka ko ihita yegukana igikombe hasigaye imikino itatu gusa ngo umwaka w’imikino urangire.
Kuri ubu Barcelona ifite amanota 91, ndetse abafana bayo batangiye kwizera ko ishobora no kurangiza shampiyona yujuje amanota 100 mu gihe yakomeza kwitwara neza mu mikino isigaye.
Iki gikombe kandi gikomeje gushimangira akazi gakomeye kari gukorwa n’umutoza Hansi Flick wageze muri Barcelona muri 2024, aho amaze gufasha iyi kipe kwegukana ibikombe bibiri bya shampiyona yikurikiranya.
Ku ruhande rwa Real Madrid, uyu mwaka wa kabiri wikurikiranya urangiye itabonye igikombe na kimwe, ibintu bikomeje guteza impaka mu bakunzi b’iyi kipe ndetse no mu banyamakuru b’imikino muri Espagne.
