Ukwezi kwa Werurwe kwahariwe Francophonie, uyu mwaka ni umwihariko hamwe n’isabukuru y’imyaka 50.
Umunsi mpuzamahanga w’ibihugu bikoresha ururimi rw’igifaransa (Francophonie) wizihizwa buri mwaka ku itariki ya 20 Werurwe, ku nshuro yawo ya 50 uzaba ari umwihariko ku Gihugu cy’u Rwanda. Hazongera kubakwa Ikigo Ndangamuco w’u Bufaransa ndetse kigatangira kongera gukora, mu rwego rwo kunoza umubano w’ibi bihugu byombi. Iki kigo kizubakwa ku Kimihurura hafi ya Kigali Convention Centre.
Ibi ni ibyatangajwe n’umuyobozi muri Ambasade y’u Bufaransa, mu kiganiro yagiranye n’itangazamakuru ku wa 4 Werurwe 2020.
Jeremie Blin, Chargé d’affaires muri Ambasade y’u Bufaransa, yagize ati “Uyu mwaka ni uw’umwihariko wa Francophonie muri rusange, no ku gihugu cy’u Rwanda by’umwihariko. Ukwezi kwahariwe Francophonie muri uyu mwaka rero gufite umwihariko, kuko guhuriranye n’isabukuru y’imyaka mirongo itanu y’uyu muryango ndetse no mu gihe turimo kuzahura umubano w’u Bufaransa n’u Rwanda.”
Ibi ngo ni uko mu gihe Ibihugu byombi u Rwanda n’u Bufaransa biri mu bihe byo kunoza umubano, hanishimirwa ko hashize umwaka Umunyarwanda Louise Mushikiwabo atorewe kuyobora Umuryango Mpuzamahanga w’Ibihugu bivuga ururimi rw’Igifaransa (OIF).
Yanaboneyeho gutangaza ko mu mpera z’uyu mwaka, Ikigo Ndangamuco cy’u Bufaransa mu Rwanda kizongera gukora. Nyuma y’uko mu mwaka wa 2014, igihe iki kigo cyari cyubatse mu mujyi wa Kigali cyasenywe kuko inyubako cyarimo itari ijyanye n’icyerekezo cy’Umujyi. Ubu kizubakwa ku Kimihurura hafi ya Kigali Convention Center (KCC).
Ni mu rwego rwo gushyira mu bikorwa icyifuzo cy’Abakuru b’Ibihugu byombi, hagamijwe kuzahura umubano cyane cyane binyuze mu muco ndetse no muri Francophonie.
Avuga ku ruhare rw’Ambassade y’Ubufaransa mu mibanire myiza y’Ibihugu byombi, Jeremie Blin yanagarutse ku ruhare Igihugu cye kigira mu butwererane n’umuco.
Ati “Ambassade y’u Bufaransa igira uruhare haba mu butwererane, umuco ndetse no mu kugaragariza abashoramari isura y’u Rwanda. Dukora ku buryo amasosiyete y’Abafaransa afata icyemezo ku makuru tuba twabahaye ku buryo u Rwanda rworoheje ishoramari, n’uko ubukungu bwarwo buzamuka; tubashishikariza kuza kuhashora imari zabo.”
Umunsi wa Francophonie wizihizwa buri mwaka ku wa 20 Werurwe. Ibihugu byibumbiye mu Muryango Mpuzamahanga w’Ibihugu bivuga ururimi rw’Igifaransa (OIF: Organisation Internationale de la Francophonie), buri Gihugu kigategura uwo umunsi ku giti cyacyo.
Umubyeyi Nadine Evelyne
