Connect with us

Hi, what are you looking for?

Ibitekerezo

Igitekerezo: Rutayisire Boniface hari ibyo asaba ko amadini n’amatorero yahindura

Rutayisire Boniface ubwo yari i Kigali mu kwezi k'Ukuboza 2017 (Ifoto/Ububiko)

Iyo ubajije umurongo w’amadini n’abasenga impamvu igihe kinini ataba aricyo bagenera guteza imbere abaturage no kubigisha kwiteza imbere babura igisubizo, bagahita basimbukira ku ntambwe yindi ngo ugomba kurenganywa no kwicwa. Ngurwo u Rwanda dufite ngiyo Afurika abakoroni batuzaniye bakaba bakomeje kutugumisha muri uwo mwijima. Igihe cyose tutarasubiza iki kibazo ngo imyumvire ihinduke Afurika, ibihugu hafi byayo byose bizahora aribyo biza mu bikennye ku Isi. 

Ese idini cyangwa itorero cyangwa abasenga, baramutse bafasheho gato ku gihe bakoresha bakakigenera kukuganira ibikorwa by’amajyambere no kwiteza imbere hari aho byabangamira ukwemera? Amatorero n’amadini aramutse agize ibikorwa bitagarukira ku mavuriro n’amashuri (kuri bamwe babifite) sibwo twagira u Rwanda rurushijeho kuba rwiza n’Afurika nziza? Ko ahandi usanga amadini afite n’inganda mu Rwanda n’Afrika bipfira he? Ni ubushobozi buke m’ubumenyi n’ubwenge abasenga n’ababayobora bafite cyangwa ni ikindi kibazo?  He kugira uzanamo kubura igishoro kuko ibyo byaza kumwanya wa nyuma iyo witegereje umutungo babona. 

Tujye ku rwego rw’abaturage noneho: Wowe usengesha uramutse ubwiye umuturage wawe uti ‘uko uza witwaje Bibiliya ujye uzana n’amakuru areba imirimo wakoze mu cyumweru witeza imbere hamwe n’amakuru y’amatungo woroye, uko amerewe ndetse n’umusaruro wabonye n’uko wawukoresheje neza, maze muri kwa kubwiriza amasaha runaka kwawe, ugafatamo iminota 10 yo kuvuga ku majyambere y’abayoboke bawe no gutanga inama no gukemura ibibazo ntibyagukundira? Kandi mushobora no kwitegurira gahunda mukabikora neza mu bundi buryo ariko buri cyumweru mukabivugaho. Aho kubwira abayoboke bawe ngo bavuge ibyaha bakoze byonyine, bamenyereze no kwatura bavuge imibereho yabo n’ingorane bafite mukugera kubikorwa byo kwiteza imbere ndetse n’amakuru yose abireba.

Kubera ikizere babagirira no kumva babwira Imana, bizatuma batekereza cyane kandi bavuge ingorane zose babifitemo ubone uko ubagira inama. Bizatuma hamenyekana n’impamvu y’ikidindiza runaka gikemuke. Igihe abaturage bazava ku ntambwe yo gutekereza kuri duke tudahagije tubatunga buri munsi, byanze bikunze bazashyira hamwe bagere ku mishinga minini ibaha n’akazi noneho igihugu cyose n’Afurika dutere n’intambwe yo kuva ku muturage utunzwe n’isuka ahinga akururira kunda tugere ku muturage utunzwe n’umushahara.

Buri wese yihe intego yo kuvana umuturage mu kiciro cyo guhinga yikururira isuka kunda agere ku kiciro cyo kuba umunyamushahara no kuba umuhinzi wihemba umushahara niba aribyo agumyemo. Ikifuzo cyanjye n’inama yanjye n’uko ibi byaba inshingano uraga abawe mu buzima no mu myemerere maze za generations uko zihererekana zikagenda zisuzuma aho urugendo rugeze. 

Ubona ko bidashoboka azantumire mbiganire nawe cyangwa mbiganirize abe. Ariko reka mbe ngaye bamwe ibitekerezo nk’ibi bigeraho bakaba abanebwe mu kureba kure kandi bitwa ko bize. Reka tugaye kurushaho n’abangabiza abakoroni kandi intego y’abakorini ari uguca intege icyateza imbere umunyaufrika n’umunyarwanda ndetse no kubabanisha neza hagati yabo.

Abatabizi babimenye ko mu babayeho bampeza banandenganya ari abiyita ko bakorera mu mwijima ngo bagamije kuzana amajyambere mu Rwanda. Ni abanyamahanga ndetse ni nabo biyita ko aribo ben’igihugu nyakuri. Nta n’ubwo baha agaciro ko ari umunyarwanda witanze hakaba n’ibitambo byinshi ngo abe ageze aho ageze.

Kuribo ngo abategetsi b’u Rwanda bashyirwaho baba bato cyangwa bakuru ngo nibo baba babyemeje biciye muri lobby zabo. Ngo abayobozi bakuru b’igihugu ni abakozi babo bakora ibyo abakoroni bashaka kandi bemeje. Birababaje ni agasuzuguro. Abo cyane cyane baturuka mu bihugu by’i Burayi n’Amerika na bake bo ku yindi migabane.

Ikibabaje n’uko baguha utuntu tw’intica ntikize (natwo bakwibye) ariko ntibaguha igihindura ubuzima bw’abanyagihugu ngo bube bwiza ku buryo bwa burundu. Umukoroni ni umukoroni. Ikindi cyagaragaye n’uko nta gishya bazana ahubwo bafata ibitekerezo by’abanyarwanda bakabyiba cyane cyane muri iki gihe bakoresheje ikoranabuhanga bakabyiyitirira babinyujije kuri runaka wundi babanje ku bihindura cyangwa kubiyoberanya.

Icyo badashoboye kwiba cyangwa bakabona hazamenyekana iyo cyaturutse ntikijya mu bikorwa. Baca intege cyangwa bagaheza nyiracyo. Kubera abanyarwanda bamaze kujijuka, muce iyi mikorere kuko bariya babikoreshwa no kugaya ubwenge bw’abirabura kuko babayeho bazi aho bakanda bagakomeza kubadindiza no kubaheza hasi.

Biriya abanyarwanda bakora byiza mu Rwanda bakababuza kuvuga uwabikoze w’umunyarwanda ni ikosa rikomeye siko bigenda ahandi ku isi. Ahandi n’umudepite utanze igitekerezo kikavamo itegeko bararimwitirira. Iyo bidakozwe rero mu banyarwanda usanga uwagitangije arenganywa ndetse akaba victime abandi ntibasobanukirwe. Benshi bagiye bazira ko ari intwari, abandi bakazira ko ari abanyabwenge, abandi nabo bakazira ko biteje imbere mubintu runaka. Ibyo rero bihagarare kuko bigaragaza ubwenge buke bitirira umwirabura. Duce umuco ko mu Rwanda n’Afurika ubaye umunyabwenge cyane cyangwa umukire cyangwa icyamamare agomba kubizira. 

Niba ukoreye ikintu cyiza igihugu ukaba uzanye igikorwa cyangwa igitekerezo cyiza byubahirwe n’igihugu mumateka kuko uba utanze umuganda wo kucyubaka. Duhagarike gutsemba abanyabwenge no kubaheza. Dufite amahirwe kandi ko u Rwanda rumaze kugira injijuke nyinshi. Nimugaragaze rero itandukaniro ry’u Rwanda rw’ubu n’urwa kera rwatinyaga umunyabwenge. 

Kubireba imyemerere, rwose buri wese nahagurukire kuzana impinduka mu idini rye, haba mumyemerere ye ndetse no mumisengere ye n’igihe abigenera maze muzamure amaso mwerekeze no kumajyambere duhindure u Rwanda rwacu n’Afurika n’isi.

Nimureke tuzane impinduka kandi bibe ibikorwa bye kuba amagambo. Duhere ku ngero zoroheje tugere kuzikomeye. Aho kubwira abantu ngo bazane amaturo ahubwo bahe igishoro ku bagikeneye maze bazaze bazanye amaturo manini ku cyo bungutse bizarushaho kuba byiza. Niba ari ukeneye itungo rito cyangwa rinini rimuhe ajye korora azaze azanye amashimwe. Niba ari ukeneye imbuto yimuhe ahinge azazane amaturo y’umusaruro. Niba ari ukeneye guhingisha amamashini n’ibimodoka, bigure ubibakodeshe ku giciro gito, niba ari ukeneye gushinga inganda nindi mirimo, bimushingire ubimukodeshe mu buryo runaka cyangwa umuhe igishoro azishyura kugira ngo gifashe n’abandi maze azaze azanye amaturo menshi etc. 

Nimuve kugukamura ubusa bw’amaturo n’ubutindi mu baturage ahubwo nimutere intambwe mubabibemo ibitekerezo n’ubukungu n’ijambo ry’Imana, bizatuma n’ubutumwa bugera kure kuko hazaba hari ubushobozi. 

Nk’ubu buri wese yibaze, ko u Rwanda rwacu ruri kwaguka rukagera kure mu isi yose hari ingabo zacu na police na Leta yacu, ese ukwemwera kw’abanyarwanda n’umuco wacu bigezeyo bikaba hafi aho y’uwo muntu w’icyo gihugu cy’amahanga wadukunze kubera amahoro tumuhesha byaba ari bibi? Umuco wacu ugezeyo ugashinga imizi tugakurayo n’ubukungu dukorana nabo business byaba ari bibi? Nonese byagerayo gute kandi amadini n’amatorero ndetse n’abakora iby’umuco nk’abahanzi n’abandi bose hamwe bitsamura amenyo akagwa? Ntacyo bifitiye cyane cyane mu bitekerezo byo guhanga udushya ndetse nta na vision y’isi bafite. Ntamisengere dufite twajyana ahandi yitwa iy’u Rwanda. N’ubwo dusenga Imana imwe ku isi ariko abandi usanga bafite imisengere n’amadini byabo. Nta njyana y’umuziki n’imiririmbire bifite irangamuntu nyarwanda tugira byashimisha abatuye isi bakava hasi. Nta mirire n’imitekere dufite ngo yitwe iy’u Rwanda ku buryo twagaburira abatuye isi bakayihururira bayishima ikatuzanira ubukungu ikaduhera n’akazi abanyarwanda mu isi. 

Ingero zifatika: Nk’ubu Perezida wacu w’igihugu yayoboye Afurika (AU) birarangira bigenda gutyo, habe n’akantu na kanwe k’abanyarwanda basanzwe baba barasize banditse mu mitwe y’abandi banyafurika ngo kanatubyarire ubukungu kabe n’urwibutso mu mateka. Ibyiza dutahira kubivuga gusa bikayoyoka. Ubu tuyoboye Commonwealth n’indi miryango ariko byose bizarangira gutyo kuko ntacyo dufite tujya kwerekana mu isi.

Indege yacu Rwandair igera hose ku isi ikanashimwa cyane, ikindi cyacu kiyiherekeza cyakwamamarayo cy’agaciro n’ibyiza by’umunyarwanda muri ibyo bihugu ni ikihe? Tuzabaho turi abakene muri byose mu migirire no mu mitekerereze kugeza ryari? Tuzabaho dupfusha ubusa ingabo zacu na Perezida ku byiza bereka isi kugeza ryari?  Buri wese navuge ngo ndabirambiwe maze yizanemo impinduka kandi ayizane no muri bagenzi be.

Yewe n’ibyo dufite ino i Rwanda ntidushobiye no kubibyaza umusaruro. Abo batuye isi ntidushobora kubatumira mu Rwanda ngo baze baruhukire kumucanga waba uzengurutse ibiyaga byacu nk’uko abakerarugendo usanga buzuye ku nyanja mu bindi bihugu bakahatinda cyane. Kandi tubikoze ntitwabura n’abakerarugendo barenga miliyoni amagana kubera igihugu cyiza n’umutekano n’ibihe byiza gihorana. 

Maze imyaka ntanga ibi bitekerezo ariko nta gikorwa kuko mu makuru namenye ngo ba banyamahanga badukoreramo mu mwijima baba barabuze uko babyiba ngo baze bavuga ngo nibo babitekereje. Yewe ngo na cya gitekerezo cyindi natanze cyo kuba hashyirwa Piscine (swimming pool) y’abaturage muri buri murenge bikazagera no mu tugari tunini, buri muturage akigishwa kandi akoroherezwa kuyikoresha nabyo byarabariye. Munyumvire ngo kuko byahindura imibereho y’abaturage, isuku, sport, imitekerereze n’ibindi.

Kugeza ubu u Rwanda rukwiza isi umuco w’amahoro ushingiye ku ngabo na police. Ikindi tujyana hanze cyaherekeza ibyo ni ikihe? Ntacyo. Igihugu kiracyambaye ubusa mu byerekezo byose. Uruhande rw’abasiviri rurihe muri iryo terambere ry’u Rwanda mu isi? Duhaguruke tubigereho muri byose duhereye ku muturage nyir’izina tuzamuke tugere hejuru mu gihugu mu nzego zose ndetse tugere no ku rwego rw’isi. 

 Aho kuraza umuntu mu rusengero cyangwa kumwiriza ubusa ahubwo muraze akora yiteza imbere narangiza asenge anatange amaturo ashimira Imana. 

 Ko ibihe bihinduka n’iki cyabuza n’imyemerere gutera imbere igana amajyambere? Ese kudatera imbere kandi ubishoboye byo ntibyafatwa nk’icyaha? Icyo cyaha kizatangira kwicuzwa ryari? Ubu butumwa ubishoboye abugeze ku bayobozi b’amadini n’amatorero azi ndetse n’abasenga bose azi.

Murakoze

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.