Ingengo y’imari ya Leta ntiyari ikwiye gukoreshwa mu gutegura Jenoside

Kuba ingengo y’imari ya Leta yarakoreshejwe mu gutegura no gushyira mu bikorwa umugambi mubisha wa Jenoside yakorewe abatutsi muri mata 1994, ni kimwe mu bimenyetso bigaragaza ko iyi Jenoside yari yarateguwe, ndetse ari na byo byayihaye imbaraga mu koreka imbaga y’Abanyarwanda.
Ibi ni bimwe mu byagarutsweho mu muhango wo kwibuka ku nshuro ya 22 abahoze ari abakozi ba Minisiteri y’imari n’igenamigambi ku wa 20 Gicurasi 2016, aho abari bitabiriye uyu muhango bongeye kwibutswa uburyo Leta yateguye Jenoside mu nzego zitandukanye zirimo n’iyahoze yitwa Minisiteri y’Imari.
Muri uyu muhango Dr Bideri Diogene, Umunyamategeko muri Komisiyo y’igihugu yo kurwanya Jenoside (CNLG) yasobanuye neza ndetse atanga n’ingero zigaragaza uburyo imari ya Leta yakoreshwaga mu kugura ibikoresho byo kwifashisha gutsemba Abatutsi.
“Kuva mu 1990 kugeza mu 1993, Leta y’u Rwanda yasabaga inkunga amahanga ndetse kigasaba n’amadeni yo kugura imipanga, amasuka, imbunda n’ibindi bikoresho byo kwica abantu kugira ngo hanozwe neza umugambi wo gutsemba Abatutsi, ifashijwe n’igihugu cy’u Bufaransa n’u Bushinwa n’abashoramari bari bakomeye. Muri iyi myaka kandi buri serire yahabwaga imbunda, zikwirakwizwa mu gihugu hose. Ibi bikoresho ni na byo byakoreshejwe muri Jenoside, kuko abagera kuri 90,9% bicishijwe imipanga, abandi bakicishwa imbunda, bagakubitwa kugeza bapfuye, …” Dr Bideri Diogene.
Muri uyu muhango kandi Minisitiri w’Imari n’igenamigambi, Amb. Claver Gatete, yanenze cyane abagize uruhare mu gutegura no gushyira mu bikorwa Jenoside, anashima Leta y’ubumwe bw’Abanyarwanda yongeye kugarura umutekano mu gihugu, kandi ingengo y’imari ikaba ikoreshwa mu bikorwa by’iterambere.
“Abateguye Jenoside bakanayishyira mu bikorwa, bakoze nabi cyane, ndetse ubu ni bo bazerera mu mahanga kandi bakaba banahigwa bukware kubera ibyo bakoze. Ubu igihugu cyacu kimaze kugera kuri byinshi byiza dukesha ubuyobozi bwiza, kandi imbaraga dufite mu kucyubaka tukiganisha ku iterambere rirambye, turwanya ingengabitekerezo ya Jenoside no kugarura ubunyarwanda mu gihugu…”
Minisiteri y’imari n’igenamigambi yifatanije n’imiryango y’abahoze ari abakozi bayo mu kwibuka abazize Jenoside yakorewe Abatutsi basaga 100, kikaba igikorwa ngarukamwaka.
Pascy