Kigali: Abanyagatsibo mu gukusanya inkunga yo gufasha abarokotse Jenoside

Abakomoka mu karere ka Gatsibo bakorera hanze y’imbibi z’ako karere, mu rwego rwo kugira uruhare mu mibereho n’iterambere ry’akarere kabo bashinze Ihuriro ryitwa Gatsibo Brothers and Sisters ommunity (Gatsibo B&S Community), bose bahuriramo.

Muri iki gihe cy’iminsi 100 yo kwibuka Jenoside yakorewe Abatutsi, babinyujije muri iryo huriro barakusanya inkunga ya miliyoni nibura 10 z’amafaranga y’u Rwanda, kugira ngo bafate mu mugongo abatishoboye bacitse ku icumu rya Jenoside yakorewe Abatutsi muri Mata 1994.

Nk’uko bitangazwa na Gapira Aloys, Perezida wa Gatsibo B&S Community, Abanyagatsibo bakorera hanze y’imbibi z’akarere cyane cyane abakorera i Kigali, bahisemo kwishyirahamwe kugira ngo barusheho kumenyana, gusabana, gufashanya no kugira uruhare mu iterambere ry’igihugu bahereye ku karere kabo.

“Muri iyi minsi ijana yo kwibuka, tuzifatanya n’abatishoboye bacitse ku icumu rya Jenoside yakorewe Abatutsi, ku buryo tuzubakira icumbi umwe muri bo, tunabaremere ku buryo tuzatanga inka imwe muri buri murenge w’Akarere ka Gatsibo. Ibikorwa bizatwara nibura Miliyoni icumi z’amafaranga y’u Rwanda, kandi yatangiye gutangwa n’abagize Ihuriro.” Ibitangazwa na Gapira Aloys.

“Si ibyo bikorwa gusa, kuko ku ikubitiro twashoboye gukora ubusabane bugamije kumenyana, bwitabiriwe n’abantu benshi kandi twatumiyemo n’ubuyobozi bw’akarere. Twitabiriye imihango yo kwibuka no gushyingura mu cyubahiro imibiri y’abazize Jenoside yari ishyinguye mu miryango, imihango yabereye i Kiziguro;  twatabaye kandi tunifatanya n’imiryango ibiri yabuze ababo muri iyi minsi. Ibikorwa by’urukundo ni intego yacu.” Ibyongerwaho na Gapira.

Abagize Gatsibo B&S Community barateganya gutangira ibikorwa byabo mu kwezi kwa Gicurasi 2016, kuko magingo aya bamaze gukusanya amafaranga azakora imirimo asaga Miliyoni indwi (7,000,000Frw). Ayo mafaranga yavuye ku bwitange bwabo kandi ubukangurambaga burakomeje.

Niyonziza Félicien, Perezida wa Ibuka (Umuryango uharanira inyungu z’abacitse ku icumu rya Jenoside) mu karere ka Gatsibo, mu kiganiro na Panorama yadutangarije ko igikorwa cy’Ihuriro ry’Abanyagatsibo baba hanze y’akarere, kije cyunganira ibindi bari basanzwe bakora ariko kuba barishyize hamwe byongereye imbaraga.

“Nubusanzwe turafatanya ariko uyu mwaka bagaragaje imbaraga zidasanzwe kuko bahisemo kwishyira hamwe, bahuza amaboko, kugira ngo ibikorwa byose babihuriremo aho kugira ngo buri wese ajye akora ibyo ashoboye. Ni igikorwa cyiza cyo gushyigikirwa, kandi natwe turi imbere mu karere tuzafatanya na bo.” Ibitangazwa na Niyonziza Felicien.

Ihuriro ry’abanyagatsibo “Gatsibo B&S Community” bahize umuhigo wo kubakira umuntu umwe mu batishoboye barokotse Jenoside, Akarere kakaba karabahaye utuye mu murenge wa Rugarama. Ibikorwa byo kubaka iyo nzu biratangirana n’uku kwezi kwa Gicurasi 2016.

Bazaremera kandi abantu 14 batishoboye barokotse Jenoside yakorewe Abatutsi, ku buryo umuntu umwe muri buri murenge y’Akarere ka Gatsibo azahabwa inka.

Ibikorwa byose biteganijwe ko bizamurikirwa abagenerwabikorwa ku wa 02 Nyakanga 2016.

Abagize Gatsibo B&S Community bagasaba Abanyagatsibo bose bakorera hanze y’imbibi z’Akarere ndetse n’ababa mu mahanga, guhuza imbaraga bagateza imbere akarere kabo.

Uretse ibikorwa bijyanye n’ubusabane no kumenyana no gufashanya hagati y’Ihuriro, bafite icyerekezo cyo kugira uruhare mu bikorwa by’iterambere ry’akarere, no gufatanya mu bibateza imbere ubwabo bigateza imbere n’igihugu.