Urwego rw’Igihugu rw’Ubugenzacyaha, RIB, rwatangaje ko rwataye muri yombi Mutangana Jean Bosco wigeze kuba Umushinjacyaha Mukuru w’u Rwanda, ubu akaba ari mu buroko. Akurikiranyweho icyaha cyo gukoresha inyandiko mpimbano.
Aganira na igihe.com dukesha iyi nkuru, Umuvugizi w’Umusigire wa RIB, Dr Murangira B. Thierry, yemeje amakuru y’itabwa muri yombi rya Me Mutangana wari usigaye akora akazi k’ubwunganizi mu mategeko (Avocat).
Yavuze ko Mutanga amaze iminsi ibiri mu buroko kuko yafunzwe tariki ya 26 Ukwakira 2020, aribwo yafashwe na RIB akaba akurikiranweho gukoresha inyandiko mpimbano. Afungiye kuri Sitasiyo ya RIB ya Remera.
Yakomeje avuga ko iperereza rikomeje mu gihe dosiye iri gukorwa kugira ngo ishyikirizwe Ubushinjacyaha.
Icyaha Mutangana akurikiranyweho giteganywa n’ingingo ya 276 y’itegeko riteganya ibyaha n’ibihano muri rusange. Igena ko aramutse abihamijwe n’urukiko, yahanishwa igifungo kitari munsi y’imyaka itanu ariko kitarengeje imyaka irindwi n’ihazabu y’amafaranga atari munsi ya miliyoni eshatu ariko atarenze miliyoni eshanu.
Rwanyange Rene Anthere
