Ni igikorwa cyateguwe ku bufatanye bw’imiryango itari iya Leta iharanira ubuzima bwiza n’ubutabera yahuje imbaraga ibitewemo inkunga n’Umuryango w’Ubumwe bw’Iburayi (EU) kuva ku wa 22 Kamena batangije igikorwa cyo kugoboka imiryango y’abatishoboye yabona ibiyitunga ari uko bakoze (nyakabyizi) yahuye n’ingaruka za COVID-19.
Iki gikorwa cyatangiriye mu karere ka Gasabo, cyakomereje mu karere ka Rwamagana, mu murenge wa Kigabiro ku wa 2 Nyakanga 2020, aho imiryango y’abatishoboye 267 yashyikirijwe inkunga igizwe n’ibiribwa ndetse n’ibikoresho by’isuku bizabafasha mu guhangana n’ingaruka za COVID-19.
Abatishoboye bashyikirijwe ni abangavu babyariye iwabo, abafite virusi gatera SIDA, abakora uburaya n’abakundana bahuje ibitsina; bakaba bahawe ibiribwa birimo ibishyimbo, umuceri, kawunga, ifu y’igikoma, umunyu, isukari, amavuta, amata y’abana bato ndetse n’ibikoresho by’isuku birimo isabuni n’impapuro zo kwisukura.
Imiryango 267 yo mu karere ka Rwamagana yahawe ibiribwa n’ibikoresho by’isuku bibafasha guhangana n’ingaruka za COVID-19 (Ifoto/Nadine Everyne)
Bashyikiriza aba bagenerwabikorwa ibyo babateguriye, Umuyobozi w’Akarere ka Rwamagana wungirije ushinzwe imibereho myiza, Mutoni Jeanne, yabibukije ko ubuzima ari ubwa mbere bityo ko bakwiye kubwitaho.
Yagize ati “Ku bufatanye n’umushinga wa ‘Strive Foundation Rwanda’ hatanzwe ibiribwa bitandukanye ku babyeyi n’abangavu babyariye iwabo ndetse n’abafite ubwandu bw’agakoko ka SIDA, hagamijwe kubafasha no kurwanya inzara; mu by’ukuri bari bacyeneye ibiribwa kubwo ibihe turimo bigaragara ko akazi kagabanutse tukaba duhamya ko bigiye kubakenura mu ngo. Turashimira cyane aba bafatanyabikorwa bakomeje kwita ku buzima, by’umwihariko muri ibi bihe byo kwirinda icyi cyorezo.”
Yongeyeho ko bakomeje ubukangurambaga nk’Akarere, mu rwego rwo kubafasha mu kubahugura ku bijyanye no kwirinda SIDA, gutwita inda zitateganyijwe, ibijyanye n’imirire no kuboneza urubyaro ndetse no kuguma kubahiriza ingamba zo kwirinda COVID-19.
Umuyobozi w’Akarere ka Rwamagana wungirije ushinzwe imibereho myiza, Mutoni Jeanne (Ifoto/Nadine Everyne)
Denyse, umwe mu bakiriye inkunga kuri uyu munsi, ni umubyeyi w’abana babiri bose yabyariye iwabo. Yishimiye ibyo yashyikirijwe ndetse yiyemeje kwihutira gutanga ubwisungane mu kwivuza mu rwego rwo kurushaho kwita ku buzima.
Ati “Bakoze cyane rwose kutuzirikana, ni ubufasha bukomeye byonyine no kuba ari twe bahisemo. Nari mfite ikibazo cya Mituweli kuko bitanyorohera gutangira abana banjye babiri n’umubyeyi wanjye, ariko iyi ‘envelope’ bampaye ni cyo cya mbere ngiye gukemuramo.”
Muteteri we avuga ko usibye inkunga y’ibiribwa n’ibikoresho by’isuku bashyikirijwe none, ashima n’uburyo bahurira mu matsinda kuko bubafasha guhuza urugwiro bakitinyuka no kuba bahurira ku bikorwa bibafasha kwiteza imbere.
Yagize ati “Turashima iyi nkunga ije kutwunganira muri iyi minsi usanga imibereho igoye, turabikesha kuba duhurira hamwe kuko nta handi bari kutumenyera. Biradufasha rero mu mibereho yacu, ndetse aka kanyamuneza tubyakiranye karadukomezamo ubushake bwo kwitabira amatsinda no kurushaho guhuza ibitekerezo ngo dufatanye mu kuzamura imibereho.”
Yakomeje asaba ko inzego bireba zabafasha kujya babahora hafi bakabungura inama, ku buryo bibaye byiza n’abatega (abakora uburaya) babicikaho.
Ati “Abenshi muri twe twacikirije kwiga, habayeho nk’uburyo abakibibashije twafashwa bakigishwa imyuga itandukanye; twafatikanya natwe kwiteza imbere duhereye ku guhindura imibereho ubu itaraba myiza.”
Hakenewe imbaraga mu bukangurambaga
Umunyamabanga Nshingwabikorwa w’Ihuriro ry’Imiryango itari iya Leta ishinzwe kurwanya icyorezo cya SIDA, guteza imbere ubuzima ndetse no guharanira uburenganzira bwa muntu, Kabanyana Nooliet, yasobanuye ku ruhare rwabo mu kunganira Leta mu kurwanya icyorezo cya covid-19 mu Rwanda n’ikwirakwira ryayo.
Yagize ati “Ibikorwa byacu byibanda ku bukangurambaga ku mbugankoranyambaga dutambutsa ubutumwa bujyanye no kwirinda, burimo gukaraba neza intoki n’amazi meza n’isabune, gukomeza kwambara agapfukamunwa kandi neza ndetse no kwirinda ingendo zitari ngombwa cyangwa se igihe bagiye aho bahurira bakibuka gusiga nibura metero hagati y’umuntu n’undi.”
Umunyamabanga Nshingwabikorwa w’Ihuriro ry’Imiryango itari iya Leta ishinzwe kurwanya icyorezo cya SIDA, guteza imbere ubuzima ndetse no guharanira uburenganzira bwa muntu, Kabanyana Nooliet (Ifoto/Nadine Everyne)
Yongeyeho ko nk’imiryango itari iya Leta, bazirikana cyane abagizweho ingaruka mu mibereho ku batakaje akazi nk’ibyiciro by’abakora uburaya n’abarimu; tukabagenera ibibatunga ndetse n’inkunga z’ibikoresho by’isuku bibafasha mu gukomeza guhangana twese muri gahunda imwe Igihugu cyafashe.
Uyu ni umushinga uterwa inkunga n’Umuryango w’ubumwe bw’Ibihugu by’Iburayi (EU), wateguwe n’imiryango itari iya Leta yahuje imbaraga ine ariyo Rwanda NGOs Forum on HIV/AIDS and Health Promotion, Health Development Initiative (HDI), Strive Foundation Rwanda (SFR), Ihorere Munyarwanda Organization (IMRO); uzamara amezi atatu (3) urashyirwa mu bikorwa mu turere tugize Umujyi wa Kigali, mu karere ka Rwamagana n’aka Rubavu, ku miryango y’abatishoboye ibihumbi bibiri (2000).
UMUBYEYI Nadine Evelyne
