U Burusiya bwatangaje ko urukingo Sputnik V rurinda umuntu kwandura Covid-19 ku gipimo cya 92 ku ijana nk’uko byerekanwa n’ibipimo by’agateganyo byavuye mu igerageza.
Nk’uko tubikesha Reuters, Ibiro ntaramakuru by’Abongereza, ibi byatangajwe n’ikigega cya leta gishinzwe iby’imari kuri uyu wa gatatu, tariki ya 11 Ugushyingo 2020.
Ibi byavuye mu cyiciro cya nyuma cy’igerageza ry’urukingo ku bantu bibaye ibya kabiri ku isi, mu muhate wo gukora urukingo rw’iki cyorezo kimaze kwica abarenga miliyoni 1.2 kikanangiza ubukungu ku isi.
Ku wa mbere, kompanyi ebyiri iyo mu Budage n’iyo muri Amerika zirimo gufatanya, zatangaje ibyavuye mu igerageza nk’iri ry’urukingo rwazo, zivuga ko rukingira COVID-19 ku gipimo kirenga 90 ku ijana.
Izi nkingo zose ntiziremezwa n’abashinzwe ubuzima ku isi ko zatangira guterwa abantu ku isi.
Mu kwezi kwa Kanama 2020, u Burusiya ni cyo gihugu cya mbere cyatangaje ko cyageze ku rukingo bise Sputnik V, hakurikiyeho igerageza ku bantu benshi.
Ibi byavuye muri iryo gerageza by’agateganyo, bishingiye ku cyiciro cya mbere ku bantu 16,000 bahawe urwo rukingo rwa doze ebyiri nk’uko bivugwa na Russian Direct Investment Fund (RDIF) yateye inkunga ikorwa ryarwo.
Iri gerageza ryose riri gukorwa ku bantu 40,000 ahantu hatandukanye mu mujyi wa Moscow nk’uko Reuters ibivuga, 1/4 cyabo bahabwa umuti umeze nk’urwo rukingo (ibizwi nka ‘placebo’).
Abatewe Sputnik V yabarinze kwandura Covid-19 ku rugero rwa 92% kurusha abatewe umuti umeze nkayo, nk’uko ikigega RDIF kibivuga.
Nkubiri B. Robert
