U Rwanda n’u Bushinwa byasinyanye amasezerano y’ubufatanye agamije guteza imbere ubwikorezi bwo mu kirere, by’umwihariko kunoza uburyo bwo kwemeza ubuziranenge bw’indege, hagamijwe kongera umutekano w’ingendo zo mu kirere.
Aya masezerano yasinywe hagati y’Ikigo cy’u Rwanda gishinzwe Indege za Gisivili (Rwanda Civil Aviation Authority) n’Ikigo cy’u Bushinwa gishinzwe Indege za Gisivili (Civil Aviation Administration of China), yitezweho kongera ubufatanye mu bya tekiniki hagati y’ibihugu byombi.
Azongera kandi ubushobozi bw’inzego zabyo mu gukurikirana no kugenzura iyubahirizwa ry’amabwiriza agenga indege za gisivili. Akazanafasha koroshya imikoranire mu kwemeza ubuziranenge bw’indege no kugenzura ibikoresho byazo.
U Rwanda ruri mu bihugu bya Afurika bifitanye imikoranire ya hafi n’u Bushinwa mu bucuruzi, ishoramari n’imigenderanire hagati y’abaturage b’ibihugu byombi.
Amb Olivier Nduhungirehe; Minisitiri w’Ububanyi n’Amahanga n’Ubutwererane, aheruka kugaragaza ko u Rwanda rwifuza ko umubano w’ibihugu byombi waguka, ukava ku bufatanye busanzwe bushingiye ku bucuruzi n’ibikorwaremezo, ukagera no ku ishoramari mu nganda, kongerera umusaruro agaciro no guteza imbere ikoranabuhanga.
Raporo y’Ikigo cy’Igihugu cy’ibarurishamibare (NISR) igaragaza ko mu gihembwe cya kabiri cya 2026, agaciro k’ubucuruzi hagati y’u Rwanda n’u Bushinwa kageze kuri miliyoni 558,27 z’amadolari ya Amerika, ahwanye na miliyari 825 z’amafaranga y’u Rwanda.
Icyo gihe, u Rwanda rwatumije mu Bushinwa ibicuruzwa bifite agaciro ka miliyoni 415,89 z’amadolari ya Amerika, mu gihe ibyoherejwe n’u Rwanda ku isoko ry’u Bushinwa byageze kuri miliyoni 142,38 z’amadolari ya Amerika.
