Panorama Sports
Mu gikombe cya Afurika, ikipe y’Igihugu y’Abagabo ya Volleyball yisanze mu Itsinda D hamwe na Cameroun, Repubulika ya Demokarasi ya Congo (RDC) na Repubulika ya Centrafrique. Iri rushanwa rirabera i Tunis muri Tunisia guhera ku wa Mbere, tariki ya 13 Nzeri, rizasozwa ku wa 26 Nzeri 2026.
Tombola y’uburyo ibihugu 13 bizahura mu matsinda yabaye ku mugoroba wo ku wa Mbere mu gihe imikino itangira kuri uyu wa 15 Nzeri 2026. U Rwanda rwisanze mu Itsinda D hamwe na Cameroun, Repubulika ya Demokarasi ya Congo na Centrafrique.
Itsinda A rigizwe na Tunisia yakiriye irushanwa, Ghana na Kenya naho Itsinda B ririmo Misiri, Gambia na Maroc. Ni mu gihe Itsinda C rigizwe na Algeria, Tchad na Nigeria. Biteganyijwe ko Ikipe y’Igihugu y’u Rwanda itangira irushanwa ikina n’iya Centrafrique kuri uyu wa Kabiri Saa 22:00 muri Palais des Sports Elmenzah.
Ubwo Ikipe y’u Rwanda yageraga muri Tunisia ku Cyumweru, yakinnye umukino wa gicuti n’iya Kenya, amakipe yombi ahitamo gukina amaseti abiri bityo birangira amakipe anganya ku iseti 1-1.
U Rwanda ruheruka mu gikombe cya Afurika muri Volleyball mu 2023, rutahana umwanya wa gatandatu, Ikipe ya Misiri ni yo yegukanye igikombe hakurikiraho Algeria, Libya, Tunisia ndetse na Cameroun.
Abakinnyi 14 bagize Ikipe y’Igihugu ni Ntanteteri Crespin, Ndayisaba Sylvestre, Nkurunziza John, Kanamugire Prince, Shyaka Frank, Twagirayezu Emmy, Niyonshima Samuel, Mutabazi Yves, Kwizera Yves, Munyinya Mugisha, Dusenge Wyclif, Ntawiha Kenny, Rwigema Simon na Mugisha Jean Santere.
Umutoza mukuru ni Frédéric Guérin, wungirijwe na Musoni Fred na Ntawangundi Dominique.
