Bamwe mu bana bavuka mu miryango idafite amikoro bo mu karere ka Nyamagabe, batajya bizihiza iminsi mikuru, barashimira ubuyobozi bw’akarere bwababereye ababyeyi bukabazirikana, bubaha Ubunani.
Ibirori byo gusangiza abana Ubunani mu karere ka Nyamagabe, byabereye mu Murenge wa Gasaka mu tugari twa Ngiryi na Nyamugari, ku wa 3 Mutarama 2023.
Abana bavuga ko bitewe n’ubuzima banyuzemo mu myaka yashize, kwizihiza Noheli n’Ubunani byagoranaga, rimwe na rimwe ntibanamenye ko bibaho. Barashimira Ubuyobozi bw’Akarere bwabazirikanye kuri iyi nshuro, mu kwizihiza iyi minsi, bagatanga icyizere ko batazatenguha urukundo no kubitaho bagaragarijwe.
Mfashwanayo Eric, umwana wo mu karere ka Nyamagabe wabaye mu muhanda akaza kugera aho ajyanwa mu Kigo ngororamuco cya Gitagata, ashimira ubuyobozi bwamusubije ubuzima.
Agira ati ”Visi meya yansanze i Gitagata arangarura nsubira mu ishuri, ubu nsoje umwaka wa kane, kandi ndifuza gukomeza kwiga nkazagera ku ntego zanjye nkaba umuntu ukomeye w’ingirakamaro. Nagiye mu muhanda kubera ubukene bwo mu muryango. Yaba mu muhanda no mu muryango kwizihiza iminsi mikuru byabaga bigoye, ariko Ubuyobozi bw’Akarere bwatubereye ababyeyi, none baduhaye n’iminsi mikuru; Imana ibahe umugisha!”
Ntabanganyimana Bruno, we avuga ko ubu ari umunyeshuri ariko wagorwaga no kubona ibikoresho; akaba asubijwe.
Agira ati ”Ndiga ariko kubona ibyo kurya n’ibikoresho birangora, bikansaba no kujya ku muhanda gushaka ibyo kurya. Kuba ubuyobozi bwatuzirikanye bukaduha ubunani n’ibikoresho byanshimishije. Noheli yabaye umunsi usanzwe kubera ubukene ariko ubu ndishimye ngiye kwiga nshyizeho umwete, nzigirire akamaro n’umuryango wanjye ndetse n’Igihugu.”
Umuyobozi w’Akarere ka Nyamagabe wungirije ushinzwe imibereho myiza y’abaturage, Uwamariya Agnes, yifurije abana kizagira umwaka mwiza uzira ingeso n’imyitwarire mibi, bagakomeza gukura bajya mbere, ababwira ko Igihugu kibakunda.
Agira ati ”Uyu mwaka dutangiye uzabe umwaka wo kugira imihigo, uburenganzira bwanyu bwose bwubahirizwe, kwiga, gukundwa, umwaka uzira ibiyobwenge, kubatera inda n’ibindi byabangamira umwana tubyamagane. Bana bacu turabakunda, abana batagize amahirwe yo kugira umuryango ubaba hafi; turahari ku bwanyu, nta mpamvu n’imwe yo kujya ku muhanda. Twese turahari ku bwanyu, uzagira ikibazo gituma ajya mu muhanda cyangwa ibiyobyabwenge azatwegere. Abana mujye mufatanya, abafite amikoro bafashe abatayafite, mufatanyije n’ababyeyi.”
Mu kwizihiza uyu munsi, Ubuyobozi bw’Akarere ka Nyamagabe n’abafanyabikorwa batanze impano zitandukanye ziganjemo ibikoresho by’ishuri, ku bana badafite amakiro ahagije, ndetse n’abitwaye neza mu ishuri mu mwaka n’igihembwe bishize.
Rukundo Eroge
