Abangavu n’ingimbi bakabakaba 600 biga mu mashuri yisumbuye bafite impano mu mikino itandukanye, bitabiriye irushanwa rigamije gukomeza kuzamura no guteza imbere impano zabo.
Ni imikino yabaye ku nshuro ya mbere, yiswe “National Talent day”, ibera mu karere ka Huye kuva ku wa 02-03 Ukuboza 2023, ku bibuga n’ahantu hatandukanye muri gahunda ya Minisiteri ya Siporo yiswe “Isonga” ku bufatanye n’Ikigo cy’u Bufaransa cyita ku iterambere -AFD (Agance Française de Développement).
Umunyamabanga uhoraho muri Minisiteri ya Siporo, Niyonkuru Zephanie, avuga ko iri rushanwa babonye riri ku rwego rwiza, hari abo bagiye gukomeza gukurikirana nk’abafite impano, zikazamuka.
Agira ati “Ni gahunda y’imikino igamije guteza imbere impano z’abana. Twagira ngo turebe aho bageze, mu biruhuko binini tuzongera dukore izindi ‘Camps d’entraînement’, ayandi mahuriro yo kureba impano no kwitorezamo. Turakomeza tubahugure! Aho biga hari dufite abatoza dukorana babakurikirana, abahungu n’abakobwa. Tuzakomeza kuzana n’abatoza barebamo abafite impano kurusha abandi, kugira ngo babajyane muri gahunda zitandunye.”
Ku ruhande rw’abana bitabiriye iri rushanwa, bishimiye gukomeza kubona imikino izamura impano zabo ndetse no guhura na bagenzi babo baturutse mu bice bitandukanye by’igihugu bagakina.
Imikino itandatu yakinwe muri iyi gahunda yo gukomeza guteza imbere impano z’abakiri bato kuri iyi nshuro ni umupira w’amaguru, gusiganwa ku magare, gusiganwa ku maguru metero zitandukanye, umupira ukinishijwe amaboko (handball), umupira w’intoki (valleyball), Basketball n’imikino ngororamubiri.
Abatsinze muri iyi mikino ya “Talent day” bahembwe ibikombe n’imidari bitewe n’imyanya bajeho ndetse n’imikino bakina.
Rukundo Eroge
