Panorama Sports
RSSB Tigers yatsinze Shanghai Sharks yo mu Bushinwa amanota 117-115, mu mukino wa kabiri wo mu Itsinda A rya FIBA Intercontinental Cup, ikomeza kongera amahirwe yo kugera muri 1/2 cy’iri rushanwa ribera i Beijing, mu Bushinwa.
Uyu mukino wabereye kuri National Indoor Stadium i Beijing, waranzwe no guhangana gukomeye hagati y’amakipe yombi, kuva ku ntangiriro kugeza ku munota wa nyuma.
Shanghai Sharks yatangiye itsinda amanota 30 mu gace ka mbere n’aka kabiri, bituma ijya kuruhuka iri imbere ku manota 60-46. Brandon Goodwin ni we wafashije Shanghai gutsinda amanota menshi.
RSSB Tigers yagarutse mu gice cya kabiri, cyane cyane mu gace ka kane, aho yatsinze amanota 32 kuri 18 ya Shanghai. Craig Randall II yafashije RSSB Tigers kugaruka mu mukino, atsinda atatu habura amasegonda 12 ngo umukino urangire, bituma amakipe anganya 103-103.
Mu minota itanu y’inyongera, amakipe yakomeje gusimburana ku manota. Hasigaye akanya gato, amanota yari 115-115. Antino Jackson yakorewe ikosa ubwo yateraga ishoti ry’amanota atatu, atsindamo amanota abiri muri free throws eshatu, RSSB Tigers ijya imbere n’amanota 117-115.
Shanghai Sharks yabonye andi mahirwe yo kunganya ku munota wa nyuma, ariko Brandon Goodwin ntiyabashije gutsinda ishoti rya nyuma, bituma Tigers yegukana intsinzi.
Craig Randall II yayoboye RSSB Tigers n’amanota 30, akurikirwa na Tyler Bey watsinze 19, Osborn Shema atsinda 16, naho Ntore Habimana atsinda 15.
Iyi ntsinzi ikomeye ishyize RSSB Tigers mu mwanya mwiza mu rugamba rwo gushaka itike ya 1/2 cya FIBA Intercontinental Cup, mu gihe imikino yo mu Itsinda A ikomeje. Rytas Vilnius itsinze Shangai Sharks, RSSB Tigers yahita ikomeza mu mikino ya 1/2.
