Minisiteri y’uburezi yibutse abahoze ari abakozi bayo bazize Jenoside

Ku wa kabiri tariki ya 12 Mata 2016, Minisiteri y’uburezi yibutse abahoze ari abakozi ba Minisiteri y’Amashuri Abanza n’Ayisumbuye ( MINEPRISEC)  Minisiteri y’Amashuri Makuru, Ubushakashatsi n’Umuco ( MINESUPRES) hamwe n’abandi bakozi b’ibigo by’izo Minisiteri bakoreraga imirimo itandukanye i Remera na Kicukiro kuri IMPRISCO, bazize Jenoside yakorewe Abatutsi muri Mata1994, yifatanije n’imiryango yabo yarokotse, kandi ibizeza ko izakomeza kubaba hafi mu bikorwa bitandukanye byo kwiyubaka no kongera kwigirira icyizere cyo kubaho.

Muri uyu muhango Minisiteri y’uburezi yagarutse ku bikorwa bitandukanye imaze gukorera bamwe mu bagize iyi miryango yarokotse  y’abahoze ari abakozi bayo n’ibindi bikorwa iteganya gukomeza gukora hirya no hino mu gihugu birimo kububakira amacumbi, kwishyurira abanyeshuri muri za Kaminuza, gusura inzibutso no kuzitera inkunga n’ibindi.

Minisitiri w’uburezi Dr Musafiri Papias Malimba mu ijambo rye yagize ati “Tuzakomeza kuba hafi imiryango y’abazize Jenoside yakorewe Abatutsi by’umwihariko abasigaye bo mu miryango y’abahoze ari abakozi ba Minisiteri y’uburezi, kandi twebwe nka Minisiteri, nitwe tugomba kugira uruhare rukomeye mu kurwanya ivangura n’ingengabitekerezo ya Jenoside mu burezi; kuko ibyabaye mu gihugu byaturutse ku ikwirakwizwa ry’amacakubiri mu mashuri.”

Umunyamabanga wa Leta muri Minisiteri y’Uburezi Ushinzwe Amashuri Abanza n’ayisumbuye, Olivier Rwamukwaya, we yagarutse ku bikorwa  bamaze gukora n’ibyo bateganya gukomeza gukorera iyi miryango. Yagize ati “Muri uyu mwaka turateganya kubakira  uwacitse ku icumu rya Jenoside yakorewe Abatutsi mu karere ka Musanze, gutanga inka 2 ku batishoboye bacitse ku icumu, gusura impfubyi irera izindi 3, gutanga amazi n’amashanyarazi mu ngo 20 z’abarokotse Jenoside bo mu karere ka Gisagara, no gusura inzibutso zirimo urwa Bisesero, Kinazi na Rusatira.”

Rwamukwaya yibukije abitabiriye uyu muhango ndetse n’abanyarwanda bose muri rusange, gukomeza gufatanya mu kuba hafi abasizwe iheruheru na Jenoside yakorewe Abatutsi, kugira ngo barusheho gukomeza kwiyubaka kandi bagafatanya mu  kurwanya ingengabitekerezo yayo, kuko ariyo ikura ikavamo amahano nk’ayagwiriye u Rwanda. Bityo abanyarwanda bagaharanira ko  izashira burundu binyuze  cyane cyane mu burezi  n’uburere buhabwa abana bakiri bato n’urubyiruko ruri mu mashuri.

Mu bindi byagarutsweho muri uyu muhango ni ibimenyetso by’ingenzi bigaragaza ko Jenoside ishobora kutazongera kuba mu Rwanda ukundi, nyuma kurebera hamwe  impinduka ziri mu burezi bwa none bihabanye cyane na mbere ya Jenoside.

Izo mpinduka zirimo kugira amahirwe angana kuri buri munyeshuri, integanyanyigisho zitarimo ingengabitekerezo, gahunda ya Ndi Umunyarwanda yakwirakwijwe mu mashuri ndetse n’ishyirwa mu myanya n’isuzumabumenyi ringana kuri bose. Ibi bikaba ari byo bitanga icyizere ko Jenoside itazongera kubaho mu Rwanda.

Kwibuka abazize Jenoside yakorewe Abatutsi mu 1994 bahoze ari abakozi ba minisiteri y’uburezi, ni igikorwa kibaye  ku nshuro ya 6 kuva iyi gahunda yatangira. Kuri iyi nshuro hibutswe abagera kuri 77, ari na bo bamaze kumenyekana ariko uyu mubare ukaba ushobora kwiyongera kuko hagikorwa ubushakashatsi kugira ngo hamenywe umubare nyakuri  w’abakozi b’iyi minisiteri bahitanwe na Jenoside yakorewe Abatutsi.

Panorama