Ishami ry’Umuryango w’Abibumbye ryita ku Buzima_OMS, ritangaza ko ubwoko bushya bwa COVID-19 buzwi nka Omicron, bumaze kugera mu Bihugu 57 hirya no hino ku Isi.
Omicron yagaragaye bwa mbere muri Africa y’Epfo, ikomeje gukwirakwira hirya no hino mu bindi Bihugu, kuko igaragaza ubushobozi bwo kwandura vuba nk’uko OMS ibitangaza. Abantu bajya mu bitaro na bo baziyongera, kubw’umuvuduko iyi virus nshya ifite.
Ubushakashatsi buherutse gukorerwa muri Afurika y’Epfo, bugaragaza ko Omicron ishobora kugabanya ubushobozi bw’inkingo zakozwe, mu gukumira ubwandu bwa COVID-19; ariko ngo ntibuzagabanuka bwose. Ni ukuvuga ko inkingo zisanzwe, zishobora no kwifashishwa mu guhangana n’ubu bwoko bushya bwa Omicron.
OMS ivuga ko ubushakashatsi buzerekana neza ubushobozi bwa Omicron bukirimo gukorwa, mu gihe abashakashatsi bo muri Amerika bo batangaza ko ibimenyetso by’ibanze, byerekana ko ubushobozi bwa Omicron bujya kungana neza nk’bwa Delta; ubundi bwoko bwa COVID-19, bwari buherutse kugaragara.
Ubwoko bushya bwa COVID-19 bwiswe Omicron, bwavumbuwe ku nshuro ya mbere mu badipolomate bari baturutse mu Burayi, bagiye mu butumwa bw’akazi muri Botswana. Ubu ikomeje gukwirakwira mu Bihugu, kuko yandura mu buryo bwihuse.
UMUBYEYI Nadine Evelyne
