Minisiteri y’ubuzima itangaza ko igihe cyari cyarateganyijwe hagati y’Ifatwa ry’urukingo rwa 2 rwa COVID-19 n’urwa 3 rushimangira cyashyizwe ku mezi 3 gusa.
Ubusanzwe inzego z’ubuzima zateganyaga ko urukingo rushimangira rugomba gufatwa n’umuntu nyuma y’amezi atandatu afashe urukingo rwa 2, ariko kuri ubu ibinyujije ku mbuga nkoranyamabaga, yavuze ko buri muntu umaze amezi atatu afashe urukingo rwa 2 ntagisibya yagana ahabera ibikorwa byo gukingira agafata urukingo rushimangira.
Minisiteri y’ubuzima iragira iti “Igihe cyo guhabwa doze ishimangira y’urukingo rwa COVID-19 cyagabanutse, kiva ku mezi 6 kigera ku mezi 3. Abanyarwanda bamaze icyo gihe bakingiwe byuzuye barashishikarizwa kugana ikigo nderabuzima cyangwa site y’ikingira ibegereye bagahabwa urukingo rushimangira.”
Ibigo bitandukanye byatangiye gushishikariza abakozi babyo cyangwa abakora mu mirimo bifite mu nshingano kwitabira gufata urukingo rwa 3 rushimangira. Urugero ni Minisiteri y’uburezi ku wa 28 Ukuboza 2021 yasohoye itangazo risaba abarimu n’abayobozi b’ibigo gutangira gufata uru rukingo mbere y’Itangira ry’igihembwe cya 2 cy’umwaka w’amashuri 2021-2022
Kugeza ku wa 28 Ukuboza 2021, nk’uko bigaragazwa na Minisiteri y’Ubuzima, abageze ku 130,155 bamaze guhabwa urukingo rushimangira. Abanyarwanda bangana na 7,629,877 bamaze guhabwa byibuze doze ya mbere, mu gihe abangana na 5,435,180 ari abahawe doze zombi.
Raoul Nshungu
