Perezida wa Cameroun, Paul Biya, yongeye kugera mu gihugu nyuma yo kumara ibyumweru birenga 10 ari hanze yacyo, igihe kinini kurusha ibindi amaze kuba Perezida kuva yatangira kuyobora Cameroun mu myaka isaga 40 ishize.
Biya, ufite imyaka 93, yageze ku Kibuga Mpuzamahanga cy’Indege cya Nsimalen i Yaoundé ku wa Kane, mu ndege yihariye yari ivuye i Geneva mu Busuwisi.
Perezida Biya yari amaze iminsi isaga 70 hanze ya Cameroun. Yari yaravuye mu gihugu ku itariki ya 7 Kamena, aho ibiro bye byatangaje ko yari yagiye mu Burayi ku mpamvu ze bwite kandi ko urugendo rwe rwari rumara igihe gito.
Kuri uyu munsi yagarutse, Biya yari aherekejwe n’umugore we, Chantal Biya. Yageze ku kibuga cy’indege ahagana saa 16:45 ku isaha yaho, nyuma ahita yerekeza ku ngoro y’Umukuru w’Igihugu, Etoudi Unity Palace.
Mu gihe imodoka ye yerekezaga ku ngoro, Perezida Biya yasuhuzaga abaturage bari bateraniye ku mihanda yo mu murwa mukuru. Bamwe muri bo bari bitwaje amabendera y’ishyaka riri ku butegetsi, Cameroon People’s Democratic Movement (CPDM), ndetse n’ibyapa byamushimira.
Kumara igihe kirekire hanze y’igihugu kwa Biya byari bimaze guteza impungenge n’ibihuha bitandukanye ku buzima bwe ndetse n’ubushobozi bwo gukomeza kuyobora igihugu. Icyakora, abategetsi ba Cameroun bakomeje kuvuga ko Perezida azagaruka.
Uru rugendo rurerure rwo hanze rw’igihugu rwongeye gutuma hibazwa ku hazaza h’ubutegetsi bwa Cameroun, cyane cyane ku muntu ushobora kuzamusimbura, mu gihe ubutegetsi bw’igihugu bukomeje kuba bushingiye cyane ku mwanya wa Perezida.
Abatavuga rumwe n’ubutegetsi bari basabye Constitutional Council gusuzuma niba hari umuntu wagombaga gufata inshingano z’Umukuru w’Igihugu by’agateganyo mu gihe Biya yari atari mu gihugu.
Gusa, kugeza igihe Perezida Biya yagarukiye, iyo nama nta cyemezo yari yafashe kuri ubwo busabe.
Paul Biya amaze imyaka isaga 40 ayobora Cameroun, bikaba bituma abarizwa mu bakuru b’ibihugu bamaze igihe kirekire ku butegetsi ku isi, ndetse akaba ari na we mukuru w’igihugu ukuze kurusha abandi ku isi.
