Perezida Kagame yageze i Gaborone muri Botswana mu ruzinduko rw’iminsi ibiri ruzaganirirwamo uko igihugu cye cyakorana na Botswana mu mishanga ikomeye.
Akigera yo yakiriwe na mugenzi we, Duma Boko, bakaba bari bugirane ibiganiro mu muhezo bizakurikirwa n’ibiganiro ku ntumwa z’ibihugu byombi ndetse no kuganira n’itangazamakuru.
U Rwanda na Botswana bizasinya amasezerano y’imikoranire arimo ayo kubuza isoreshwa ry’igicuruzwa kabiri, ajyanye no gukuraho Visa ku bantu bafite inyandiko z’inzira (Passports) zo mu rwego rw’akazi (Diplomatic), iz’abayobozi (Official), cyangwa iz’abafite Passports zisanzwe za buri gihugu.
Haranasinywa amasezerano y’ubufatanye mu by’ubwikorezi bwo mu kirere, amasezerano mu bijyanye n’ubuzima, ubukungu, ubucuruzi n’ishoramari, n’amasezerano hagati y’urwego rushinzwe ubucuruzi rwo muri Botswana (Botswana Investment and Trade Centre) n’urwego rwo mu Rwanda rushinzwe guteza imbere ishoramari (Rwanda Development Board, RDB).
Kuri uyu wa Kane Perezida Paul Kagame azasura ikigo gikomeye muri Botswana gicuruza amabuye y’agaciro ya Diyama kitwa Botswana Diamond Trading Company.
Mbere yo gusura Botswana, Perezida Kagame yari yabanje gusura Tanzania mu ruzinduko rw’umunsi yaganiririyemo na mugenzi we wa Tanzania Samia Suluhu Hassan uko ibihugu byombi byakorana mu iterambere bisangiye.
