Perezida wa Repubulika y’u Rwanda, Paul Kagame, yakiriye i Kigali Umugaba Mukuru w’Ingabo za Uganda (UPDF), Gen Muhoozi Kainerugaba, wari mu ruzinduko rw’akazi rw’iminsi ibiri rugamije gukomeza gushimangira umubano n’ubufatanye hagati y’ibihugu byombi.
Gen Muhoozi yageze mu Rwanda ku wa 25 Nyakanga 2026, yakirwa n’Umugaba Mukuru w’Ingabo z’u Rwanda (RDF), Gen Mubarakh Muganga. Uru ruzinduko rubaye mu rwego rw’ibiganiro bisanzwe bikorwa n’abayobozi bakuru b’ibihugu byombi hagamijwe guteza imbere ubufatanye, by’umwihariko mu nzego z’umutekano n’igisirikare.
Mu biganiro Perezida Kagame yagiranye na Gen Muhoozi Kainerugaba, hibanzwe ku buryo u Rwanda na Uganda bakomeza kwimakaza umubano mwiza, no gukorera hamwe mu kubungabunga amahoro, umutekano n’ituze mu Karere k’Ibiyaga Bigari.
Nk’uko byatangajwe na Village Urugwiro, “ibiganiro Perezida Kagame yagiranye na Jenerali Muhoozi Kainerugaba byibanze ku mubano ukomeye hagati y’u Rwanda na Uganda, ndetse no ku mahoro, umutekano n’ituze mu karere.”
Uru ruzinduko rugaragaza ubushake bw’u Rwanda na Uganda bwo gukomeza gushimangira umubano mwiza no guteza imbere ubufatanye mu bya gisirikare n’umutekano, hagamijwe kubungabunga amahoro n’iterambere rirambye mu Karere k’Ibiyaga Bigari.
Nyakubahwa Perezida wa Repubulika yakiriye Muhoozi Kainerugaba bagirana ibiganiro byibanze k’umutekano n’ibindi
