Uruganda rukora imiti n’inkingo rwa Pfizer rwatangaje ko amakuru amaze iminsi acicikana ku mbuga nkoranyambaga avuga ko urukingo rwa Covid-19 rwakozwe ku bufatanye na BioNTech rushobora gutera indwara ya Hantavirus atari ukuri, ahubwo ko abantu basobanuye nabi inyandiko yari yoherejwe ikigo cya Amerika gishinzwe kugenzura ibiribwa n’imiti, FDA.
Mu minsi ishize, ku mbuga zirimo Facebook na X hakwirakwijwe ubutumwa buvuga ko urukingo rwa Covid-19 rwa Pfizer na BioNTech ruzwi nka Comirnaty ruri mu bishobora gutera Hantavirus, indwara iterwa na virusi ikomoka ku mbeba n’izindi ngugunnyi.
Iyi ndwara ishobora gutera ibibazo bikomeye by’ubuhumekero, aho uyanduye ashobora kugira umuriro, kubabara umutwe n’ingingo, kugira isereri, kuruka, gucibwamo ndetse no kugira ibibazo byo guhumeka.
Iyi virusi yongeye kuvugwa cyane nyuma y’aho abantu batatu bapfiriye mu bwato bwo mu Buholandi bwitwa MV Hondius, bwari buvuye muri Argentine bwerekeza muri Cape Verde, bigakekwa ko baba baranduye Hantavirus.
Nyuma y’ayo makuru, bamwe batangiye guhuza iyi ndwara n’urukingo rwa Covid-19 rwa Pfizer, bavuga ko iri ku rutonde rw’ingaruka zishobora guterwa n’urwo rukingo.
Gusa Pfizer yasobanuye ko inyandiko abantu bagendeyeho atari urutonde rw’ingaruka zatewe n’urukingo, ahubwo ko yari ikubiyemo ibibazo byose by’ubuzima byagaragaye ku bantu bakingiwe hagati y’Ukuboza 2020 na Gashyantare 2021, hatitawe ku kuba ibyo bibazo byaraturutse ku rukingo cyangwa ku zindi mpamvu.
Iyo nyandiko yari yarashyikirijwe FDA mu rwego rwo gusaba ko urukingo rwemererwa gukoreshwa burundu nyuma yo gutangira gukoreshwa mu buryo bwihuse mu gihe cya Covid-19.
Umuvugizi wa Pfizer yagize ati: “Iyi nyandiko ntabwo yemeza ko urukingo rwacu rwateye Hantavirus. Impamvu ni uko urutonde rwari rukubiyemo ibibazo byose byagaragaye muri icyo gihe, kabone n’iyo nta sano byari bifitanye n’urukingo.”
Yakomeje ashimangira ko urukingo rwa Comirnaty rudafite virusi nzima ya Hantavirus cyangwa indi ishobora gutera iyo ndwara.
Nubwo igice kimwe cy’iyo nyandiko cyakwirakwijwe cyane ku mbuga nkoranyambaga, Pfizer yavuze ko hari ahandi hasobanura neza ko ibyo bibazo byose byari ibyagaragaye nyuma yo gukingirwa, ariko bidahita bivuga ko byatewe n’urukingo.
Ishami ry’Umuryango w’Abibumbye ryita ku Buzima, World Health Organization, hamwe n’inzego z’ubuzima muri Amerika, na byo byagaragaje ko Hantavirus ari indwara isanzwe izwi mu buvuzi kandi idafitanye isano n’inkingo za Covid-19.
Kwamamaza ko urukingo rwa Pfizer rutera Hantavirus kandi byaje no kunyomozwa n’igenzura ryimbitse ryakozwe mu Bwongereza mbere y’uko urukingo rwa Comirnaty ruhabwa uburenganzira busesuye bwo gukoreshwa mu mwaka wa 2022.
