Leta y’u Bwongereza yatangaje ingamba nshya zigamije gutabara urwego rw’utubari n’ahakirirwa abashyitsi, ruri mu bibazo bikomeye byatewe n’izamuka ry’ibiciro n’imisoro. Muri izo ngamba harimo gushyiraho inkunga igera kuri miliyoni 10 z’amapawundi, igamije gufasha abakora muri uru rwego gukomeza ibikorwa byabo no kugabanya ingaruka z’ubukungu.
Ni icyemezo kije mu gihe imibare igaragaza ko mu mezi atatu ya mbere ya 2026, utubari twinshi twafunzwe, ibintu byagize ingaruka ku bakozi babarirwa mu bihumbi, aho abagera kuri 2400 bamaze kubura akazi. Ibi byatumye haba impungenge ko ubushomeri bushobora kurushaho kwiyongera niba nta zindi ngamba zafatwa.
Ishyirahamwe ry’abakora inzoga n’utubari mu Bwongereza (BBPA) ryagaragaje ko imisoro ihanitse n’izamuka ry’ibiciro ari bimwe mu bibazo bikomeye biri gutuma ubucuruzi bwabo budindira. Mu gusubiza iki kibazo, Leta yafashe icyemezo cyo kugabanya imisoro ku kigero cya 15% ku tubari n’ahacurangirwa imiziki, icyatangiye gushyirwa mu bikorwa mu kwezi kwa Mata 2026.
Raporo zitandukanye zerekana ko buri munsi byibuze utubari tubiri dufunga imiryango, bigashyira igitutu ku rwego rwakira abashyitsi. Mu mwaka wa 2025 honyine, hafunzwe utubari turenga 300, bigaragaza ubukana bw’iki kibazo.
Umuyobozi wa BBPA, Emma Macklarkin, yavuze ko hakenewe izindi ngamba zifatika zo gukomeza kurengera uru rwego, agaragaza ko impinduka mu myitwarire y’abaguzi, igabanuka ry’inyungu, imisoro iremereye n’igiciro cy’ubuzima kiri kuzamuka ari bimwe mu bikomeje kugora abacuruzi.
Byongeye kandi, Leta yanatangaje ko mu gihe cy’Igikombe cy’Isi, amasaha yo gufungura utubari azongerwa kugira ngo abafana babashe gukurikirana imikino neza no kongera amafaranga yinjira muri uru rwego.
Izi ngamba zitezweho gufasha kongera gusubiza icyizere mu bakora ubucuruzi bw’utubari, nubwo hakiri ibibazo bisaba ibisubizo birambye mu gihe kiri imbere.
