Abofisiye baturutse mu mitwe itandukanye y’Ingabo z’u Rwanda (RDF) bitabiriye amahugurwa agamije kurushaho kubongerera ubumenyi ku Mategeko Mpuzamahanga Agenga Intambara (International Humanitarian Law – IHL), hagamijwe ko arushaho kwifashishwa mu igenamigambi no mu ishyirwa mu bikorwa ry’ibikorwa bya gisirikare.
Aya mahugurwa y’umunsi umwe yabereye muri Lemigo Hotel i Kigali ku wa 22 Nyakanga 2026, ategurwa na Komite Mpuzamahanga y’Umuryango utabara Imbabare (ICRC), ku bufatanye n’Ingabo z’u Rwanda.
Yafunguwe ku mugaragaro na Lt Col Simon Kabera, Umuvugizi Wungirije w’Ingabo z’u Rwanda, ari kumwe n’Umuyobozi wa ICRC mu Rwanda, Madamu Aurelie Grange.
Mu biganiro byatanzwe, hibanzwe ku ruhare rw’amategeko mpuzamahanga agenga intambara mu miyoborere ya gisirikare, by’umwihariko uburyo afasha abayobozi gutegura ibikorwa bya gisirikare, gufata ibyemezo bishingiye ku mategeko no kurinda abasivili mu bihe by’amakimbirane.
Abitabiriye banagaragarijwe amahame y’ingenzi arimo kurengera abasivili, gukoresha ingufu za gisirikare mu buryo bukurikije amategeko no gushyira imbere ingamba zigamije kugabanya ingaruka z’intambara ku baturage.
Lt Col Simon Kabera yashimye ubufatanye buri hagati ya Minisiteri y’Ingabo z’u Rwanda na ICRC, avuga ko bukomeje kugira uruhare mu kongerera ubushobozi abasirikare mu kubahiriza amategeko mpuzamahanga.
Yagaragaje ko ubumenyi ku Mategeko Mpuzamahanga Agenga Intambara bufasha abayobozi ba gisirikare gufata ibyemezo bishingiye ku mahame yemewe ku rwego mpuzamahanga, anashishikariza abitabiriye gukomeza kungurana ibitekerezo no gusangizanya ubunararibonye.
Ku ruhande rwa ICRC, Madamu Aurelie Grange yashimangiye ko ubufatanye bw’uyu muryango n’Ingabo z’u Rwanda bumaze igihe bugamije guteza imbere iyubahirizwa ry’amategeko agenga intambara, ashimira abitabiriye aya mahugurwa ku bushake bagaragaje bwo gukomeza kwiyungura ubumenyi.
Mu gusoza, Lt Col Simon Kabera yasabye ba Ofisiye gukoresha ubumenyi bahawe no kubusangiza bagenzi babo, agaragaza ko kubahiriza amategeko mpuzamahanga agenga intambara bifasha Ingabo z’u Rwanda gukomeza kurangwa n’ubunyamwuga, kurengera ubuzima n’agaciro ka muntu, no gusohoza neza inshingano zazo mu bikorwa bitandukanye bya gisirikare.
Ba Ofisiye ba RDF bibukijwe akamaro ko kubahiriza amategeko mpuzamahanga agenga intambara
