Panorama Sports
Umuhungu muto wa Perezida wahoze ayobora Zimbabwe, Robert Mugabe, yafashwe na Polisi yo muri Afurika y’Epfo ku wa Kane, akurikiranweho kurasa umukozi w’umuryango wabo mu rugo rwabo ruherereye i Johannesburg.
Umuvugizi wa Polisi ya Afurika y’Epfo, Colonel Dimakatso Nevhuhulwi, yemeje ko abagabo babiri bafite imyaka 33 na 24 bafashwe kugira ngo babazwe ku byabaye, ariko yanga gutangaza amazina yabo.
Ibitangazamakuru byo muri Afurika y’Epfo byatangaje ko umwe mu bakekwa ari Bellarmine Chatunga Mugabe w’imyaka 29, aho amafoto yakwirakwijwe amugaragaza yambitswe amapingu ari guherekezwa n’abapolisi.
Ibi byabereye mu rugo rw’umuryango wa Mugabe ruherereye mu gace gatuwe n’abifite mu majyaruguru ya Johannesburg. Umukozi wabo warashwe yajyanywe kwa muganga aho ari mu bitaro amerewe nabi mu buryo bukomeye.
Colonel Nevhuhulwi yavuze ko ibisobanuro birambuye ku byabaye bitaramenyekana neza, anongeraho ko iperereza rigikomeje hagamijwe kumenya impamvu n’icyateye iraswa.
Abahungu ba Robert Mugabe, barimo Robert Jr na Bellarmine Chatunga, bazwi cyane i Johannesburg kubera ubuzima bwabo bwo kwidagadura no kwishimisha mu birori bitandukanye.
Nyina wabo, Grace Mugabe, uzwi ku izina rya “Gucci Grace,” na we yagiye ashinjwa ibyaha byo gukubita no gukomeretsa mu bihe bitandukanye haba muri Afurika y’Epfo no muri Zimbabwe.
Mu Ukwakira umwaka ushize, Robert Jr yagejejwe imbere y’urukiko i Harare akurikiranyweho icyaha cyo gutunga urumogi, icyaha we yahakanye.
Polisi ya Afurika y’Epfo yatangaje ko iperereza rikomeje kandi ko amakuru arambuye azatangazwa uko azagenda aboneka.
