Abayobozi ba Polisi mu ishami rishinzwe umutekano wo mu mazi n’abayobozi mu nzego z’ibanze batangiye gusura abaturage batuye mu birwa biri mu biyaga. Ni uruzinduko rwatangiye ku itariki ya 18 Werurwe 2021 mu kirwa cya Bugarura kiri mu kiyaga cya Kivu, mu murenge wa Boneza, Akarere ka Rutsiro. Ubutumwa butangwa bugamije kwirinda ikwirakwizwa ry’icyorezo cya COVID-19, banaganira ku mutekano.
Ubwo yatangiraga uru ruzinduko mu kirwa cya Bugarura, Umuyobozi w’ishami rya Polisi rishinzwe umutekano wo mu mazi (Marine), Assistant Commissioner of Police (ACP) Elias Mwesigye, yari kumwe n’Umunyamabanga Nshingwabikorwa w’Umurenge wa Boneza. Baganiriye n’abahagarariye abaturage barimo ba mutwarasibo, abayobozi b’imidugudu ibiri igize iki kirwa cya Bugarura, Umuyobozi w’akagari kagize iki kirwa, abajyanama b’ubuzima, abahagarariye urubyiruko n’abandi batandukanye
ACP Mwesigye yibukije ko nubwo hagenda hasubukurwa serivisi zimwe na zimwe, icyorezo cya COVID-19 kigihari. Akangurira abo bayobozi bahagarariye abaturage gukomeza kwirinda ikwirakwizwa ryacyo bubahiriza ingamba zitangwa n’ubuyobozi bubishinzwe, kandi bagomba gukomeza kubikangurira abaturage bahagarariye.
Yagze ati “Hari bamwe mu baturage ba hano mu kirwa bajyaga bagira ingeso yo kwambuka rwihishwa bakajya mu gihugu cy’abaturanyi cya Repubulika iharanira Demokarasi ya Congo. Turabasaba kubicikaho bakamenya ko icyorezo kikiriho, kandi bashobora kujyayo bakakigarukana mu Rwanda. Turabakangurira gukomeza gukurikiza amabwiriza yose Leta igenda ishyiraho, agamije gukumira ikwirakwira ry’iki cyorezo, kuko niwo muti wonyine kugeza ubu uhari.”
Abaturage bo mu kirwa cya Bugarura imibereho yabo ya buri munsi ishingiye ku kiyaga cya Kivu, ni ukuvuga ko 100% batunzwe n’ibikorwa by’uburobyi. ACP Mwesigye yaboneyeho gukangurira abaturage kwirinda ibikorwa bikunze kugaragara byangiza umwuga w’uburobyi anabasaba kwirinda ubucuruzi bwa magendu bukunze kugaragara mu kiyaga cya Kivu.
Yagize ati “Dukunze gufata abantu bakoresha ya mitego ya Kaningiri yica amafi mato uhereye ku magi yayo, musabwe gukoresha imiteko mwahawe n’ikigo cy’Igihugu gishinzwe ubuhinzi n’ubworozi (RAB) kugira ngo mukomeze murobe neza kandi n’amafi akomeze kororoka. Mwibumbire mu makoperative kandi mukomeze kugira uruhare mu kugaragaza abantu barenga ku mabwiriza n’amategeko y’uburobyi.”
Muri iyo nama hatanzwe udupfukamunwa 700 tugenewe abaturage b’abanyantege nk’abageze mu zabukuru n’abandi bafite uburwayi bukomeye, kuko aribo bakunze kwibasirwa cyane n’icyorezo cya COVID-19. Abayobozi bari bahagarariye abaturage bakazadushyikiriza abaturage bayobora bafite ibyo bibazo.
Iyi gahunda yo gusura abaturage batuye mu birwa izakomereza hirya no hino mu bindi birwa bituwemo n’abaturage.
Rwanyange Rene Anthere
