Mu mukino wo guhatanira igikombe cy’Afurika cy’abatarengeje imyaka 20 kizabera muri Zambia umwaka utaha, ikipe ya Misiri yatsinze iy’u Rwanda igitego 1-0 mu mukino wabereye kuri Stade ya Kigali i Nyamirambo, ku wa 22 Gicurasi 2016.
Ikipe ya Misiri yagaragaje ko irusha iy’u Rwanda, ntibyayoroheye gupfa kubona igitego, n’ubwo yagaragaje ko imenyeranye cyane mu kibuga.
Igitego cya Misiri cyatsinzwe na Taher Mohamed ku munota wa 48 w’umukino, kuko igice cya mbere cyari cyarangiye ari 0-0. Igitego cya Misiri cyabonetse u Rwanda rumaze guhusha igitego ku mupira wakubise umutambiko w’izamu, abakinnyi ba Misiri bagahita bazamukana ab’u Rwanda, batsinda igitego rukumbi cyabonetse muri uyu mukino.
U Rwanda rwakomeje nyuma yo gusanga Uganda yarakinishije umukinnyi ufite ibyangombwa bidahuye, kandi Uganda yari yasezereye u Rwanda, ariko ibura amahirwe ityo.
Ibyo byahaye amahirwe u Rwanda yo gukina na Misiri, inkuru yamenyekanye hasigaye icyumweru kimwe gusa ngo umukino ube. Abakinnyi b’Amavubi bari bamaze icyumweru kimwe gusa bategura umukino, bishobora kuba imwe mu mpamvu zatumye batabasha gutsinda umukino ubanza wabereye i Kigali.
Mu kiganiro n’abanyamakuru, Kayiranga Jean Baptiste, umutoza mukuru w’Amavubi U-20, yavuze ko nta makuru yari afite kuri Misiri kuko yamenye ko bazakina hasigaye icyumweru kimwe ngo umukino ube.
«Ni ikipe nasanze uko nayitekerezaga kuko irategurwa kandi ifite gahunda si bya bindi byo gutoragura. Gutsindwa uyu mukino nta kintu na kimwe na kwinenga kuko ibintu byose byantunguraga.”
Kayiranga yakomeje atangaza ko kuba hari abakinnyi nka Itangishaka Blaise n’abandi yari yizeye ariko bagize imvune ku munota wa nyuma byamugoye cyane ndetse no kuba n’abakinnyi bo mu cyiciro cya mbere bamwe bakina kabiri mu cyumweru bibananiza cyane, na byo hari icyo byishe ku mibare ye.
Umukino wo kwishyura uzaba nyuma y’ibyumweru bitatu, u Rwanda rukaba rusabwa kugira ikinyuranyo cy’ibitego nibura bibiri mu Misiri kugira ngo rushobore gukomeza. Ikipe izakomeza izahura n’izatsinda hagati ya Angola na Gabon.
Abakinnyi babanje mu kibuga
Rwanda: Hategikimana Bonheur, Ahoyikuye Jean Paul, Nsabimana Aimable, Ndikumana Patrick, Yamini Salum, Ntwali Jacques, Muhire Kevin, Manishimwe Djabel, Niyibizi Vedaste, Nshuti Savio Dominique na Biramahire Abeddy.
Misiri: Mohamed E, Ramadan S., Osama H, Mohamed A, Omar M, Ahmad M, Akran M, Ahmad A, Taher M, Ahmad H na Mostafa A.
Rene Anthere
Abakinnyi b’Amavubi bakoze ibyo bashoboye. Manishimwe Djabel ashakisha uko babona igitego.
Ikipe ya Misiri y’abatarengeje imyaka 20
Ikipe y’u Rwanda y’abatarengeje imyaka 20
