Abakomoka mu karere ka Gakenke bakorera hanze yako bibumbiye muri Diaspora Gakenke, bikoze ku mufuka bakusanyije inkunga y’ibiribwa bifite agaciro k’ibihumbi bigera kuri 600, bafasha abatishoboye barokotse Jenoside yakorewe Abatutsi bakomoka mu mirenge ya Ruli na Coko batujwe mu mudugudu wa Gihura.
Ku wa 25 Mata 2019, itsinda ry’abahagarariye Diaspora Gakenke bakiriwe n’ubuyobozi bw’umurenge wa Ruli, bunamira abazize Jenoside yakorewe Abatutsi bashyinguye mu rwibutso rwa Jenoside yakorewe Abatutsi rwa Ruli, banafasha imiryango umunani y’abatishoboye barokotse Jenoside yakorewe Abatutsi batujwe mu mudugudu wa Gihura, Akagari ka Jango, Umurenge wa Ruli mu karere ka Gakenke.
Abacitse ku icumu rya Jenoside yakorewe Abatutsi baremewe n’abavandimwe babo bakorera hanze y’akarere ka Gakenke, bishimira inkunga bahawe kuko hari byinshi igiye guhindura ku mibereho yabo, kuko batujwe kure y’imirima basanzwe bahinga bityo imibereho ikaba yari ibagoye.
Munyangaju Fabien ni umusaza w’imyaka 75. Yacitse ku icumu rya Jenoside yakorewe Abatutsi akaba ari mu baremewe. Yatujwe mu mudugudu wa Gihura avuye mu murenge wa Coko. Avuga ko ubuzima butari bumworoheye kuko ari kure y’imirima ye.
Agira ati “Ubu nongeye kugira imbaraga kuko mbonye ibintunga mu gihe nagombaga gutegereza ibyo nzakura mu mirima yanjye nab wo iri kure. Navunikaga ku buryo kubona ibyo kurya bihagije byari bigoye.”
Ashimira ingabo zari iza FPR Inkotanyi z’abarokoye hamwe n’abakomeza kubazirikana, anavuga kandi ko ku mutima we hongeye kuruhuka nyuma yo gutanga imbabazi ku babagiriye nabi.
Mukankusi Immaculée, ni umubyeyi wacitse ku icumu rya jenoside yakorewe Abatutsi, atuye mu mudugudu wa Gatare, Akagari ka Rwesero mu murenge wa Ruli. Inzu ye ayibanamo n’umuhungu we, umukazana n’umwuzukuru. Avuga ko n’ubwo umuhungu we akora uko ashoboye ngo babone ikibatunga, hari ubwo Babura icyo bararira kubera kwishyura moto akoresha ariko ibyo babonye bigeye kubafasha kugira icyo bazigama.
Agira ati “imibereho yacu iragoye cyanecyane ku kubona ibidutunga. Hari ubwo tuburara kubera ko umuhungu wange aba agomba kwishyura uwamuhaye moto akoresha. Ubu tugiye kumara igihe nta bibazo by’imibereho dufite. Ndashimira abakomeza gutekereza ku mibereho yacu, bakatuzirkana ariko by’umwihariko uyu munsi natunguwe cyane kuko sinari niteze ko ibi mbonye byari byeanteguriwe.”
Shyaka Vedaste uyobora Diaspora Gakenke n’Umukozi w’akarere ushinzwe imibereho myiza, Nyirandikubwabo Eurelie, bashyikiriza inkunga abatishoboye barokotse Jenoside yakorewe abatutsi batuye i Ruli (Ifoto/Panorama)
Umuyobozi wa Diaspora Gakenke, Shyaka Vedatse, mu kiganiro n’Ikinyamakuru Panorama, yavuze ko bishyizehamwe nk’abavuka mu karere ka Gakenke bikwiye ko bafasha bamwe mu bacitse kw’icumu rya Jenoside yakorewe Abatutsi batuye mu mirenge ya Ruli na Coko.
Agira ati “Abatishoboye bacitse kw’icumu rya Jenoside yakorewe Abatutsi bugarijwe n’ibibazo bitandukanye, noneho abatuye muri uyu mudugudu bo bigeretseho ko bari kure y’imirimo yabo. Twasanze rero icyabagoboka vuba ari uko twabaha ibiribwa. N’ubwo atari byinshi ariko babyishimiye cyane kuko ntitwigeze tubateguza ko hari icyo tuzabaha.”
Shyaka akomeza avuga ko Diaspora ya Gakenke hari ibindi bikorwa bafashamo abatuye akarere kuko batangiye ubwisungane mu kwivuza (Mituweli) abaturage ijana, banagira igihe cyo kwifatanya n’abatuye akarere mu gikorwa cy’umuganda.
Umunyamabanga Nshingwabikorwa w’Umurenge wa Ruli, Bizimana JMV, atangaza ko bishimiye igikorwa cy’impuhwe cyakozwe n’abavuka mu karere ka Gakenke bakorera hanze yako, kuko ari igikorwa gikomeye cyane k’ubwo gukomeza kuzirikana ingaruka zasigiwe abarokotse Jenoside yakorewe Abatutsi.
Agira ati “Ibi babikoze k’ubw’urukundo n’ubushake kuko babashije gusengura bakareba ibibazo abacitse ku icumu rya Jenoside yakorewe Abatutsi bafite. N’abandi bose bakwiye kujya bibona mu bikorwa by’iwabo.”
Avuga kandi ko ari isomo rikomeye ku batuye imbere mu karere kuko na bo kwibona mu bikorwa byo gufasha abatishoboye bacitse ku icumu rya Jenoside yakorewe Abatutsi, anashimira urwego rw’abikorera mu murenge wa Ruli na bo bafashije abatishoboye barokotse Jenoside yakorewe Abatutsi kuko batanze amabati ijana, sima bakanatanga ibiribwa.
Mu murenge wa Ruli habarurwa imiryango 38 y’abatishoboye barokotse Jenoside yakorewe Abatutsi, bose barubakiwe ariko muri yo imiryango 15 inzu zabo zikenewe gusanwa.
Diaspora ya Gakenke na PSF ya Ruli biyemeje kubakira urugo (uruzitiro) inzu zubakiwe abatishoboye barokotse Jenoside yakorewe Abatutsi bari mu miryango itandatu bakomoka mu mirenge ya Ruli na Coko.
Umukozi ushinzwe imibereho myiza mu karere ka Gakenke, Nyirandikubwabo Eulerie, asaba abatuye mu karere ndetse n’abahakomoka gukomeza kuba hafi abatishoboye barokotse Jenoside yakorewe Abatutsi. Avuga ko nk’ubuyobozi bw’akarere bishimiye igikorwa cyakozwe n’abakavukamo bakorera ahandi.
Agira ati “Iki gikorwa kije cyunganira ibindi akarere gakorera abatishoboye bacitse kw’icumu rya Jenoside yakorewe Abatutsi. Twishimiye ko baje gufata mu mugongo aba baturage, urukundo bagaragaje bazaruhorane.”
Rwanyange Rene Anthere
Abahagarariye Diaspora Gakenke, PSF n’ubuyobozi baganira n’abacitse ku icumu rya Jenoside yakorewe Abatutsi batuye mu murenge wa Ruli, Akagari ka Gihura (Ifoto/Panorama)
