Raoul Nshungu
Gen Muhoozi Kainerugaba, uyobora Umugaba Mukuru w’igisirikare cya Uganda yatumiye abanyarwanda gusohokera muri iki gihugu mu gihe u Rwanda ruzaba rwizihiza ku nshuro ya 31 Umunsi wo Kwibohora.
Mu butumwa buri mu rurimi rw’Ikinyarwanda Gen Muhoozi yanyujije ku rubuga nkoranyambaga rwa X, yagize ati “Nshuti bavandimwe b’Abanyarwanda, mu gihe mwegereje iminsi mikuru ijyanye no #Kwibohora31 n’ibiruhuko biri imbere, ndabatumira n’umutima wanjye wose, muze mudusure hano mu Bugande.”
Gen Muhoozi yibukije Abanyarwanda ko imipaka ifunguye kandi ko muri Uganda ari amahoro, abasaba kuzajya kwishimana n’abavandimwe, basure inshuti n’imiryango.
Akomeza agira ati “Imipaka irafunguye, amahoro ni yose. Muze mwishime n’abavandimwe, musure inshuti n’imiryango, mwidagadure mu gihugu cyanyu, muhagurukane n’umunezero n’akanyamuneza. Uganda ni iyanyu, murisanga iwanyu. Mbifurije ibiruhuko byiza. Imana ibarinde.”
Umuyobozi w’Akarere ka Kisoro, Abel Bizimana, yasubije Gen Muhoozi ko umubano w’Abafumbira n’Abanyarwanda ari mwiza nk’amatama n’amatwi, cyane ko basangiye umuco. Yaboneyeho gushimira Perezida Paul Kagame na Yoweri Museveni bafashije impande zombi gukomeza kubana neza.
Agira ati “Imana y’u Rwanda igusakazeho imigisha myinshi nyaguhorana amata mu itama. Twebwe Abafumbira b’i Kisoro umubano n’abavandimwe bacu b’Urwagasabo ni ugutwi n’ibinga, dore ko dusangiye umuco gatanu kuri gatanu. Harakarama ba Perezida bacu bombi badushoboje kugira amahoro n’umubano bisesuye.”
Gen Muhoozi abivuze nyuma y’aho Minisiteri y’Abakozi ba Leta n’Umurimo (MIFOTRA) iherutse gutangaza ikiruhuko kuva munsi w’ubwigenge tariki ya 1 Nyakanga kugera ku kwibohora tariki ya 4 Nyakanga.
Iyi minsi iherekezwa n’ikiruhuko cy’impera z’icyumweru (Weekend), bivuze ko abakozi bazasubira ku mirimo ku wa mbere w’icyumweru kigukiraho.
