Itangazo ryatanzwe n’Ibiro bya Minisitiri w’Intebe kuri uyu wa 31 Nyakanga 2021, ritangaza ko Madame Yolanda Makolo yagizwe Umuvugizi wa Guverinoma muri Minisiteri y’Ububanyi n’amahanga n’Ubutwererane.
Inshingano zahawe Yolanda zari zisanzwe zifitwe na Ministiri w’Ububanyi n’amahanga n’Ubutwererane, Dr Vincent Biruta. Ni ubwa mbere izi nshingano zihawe umuntu ukorera muri iyi Minisiteri utari Minisitiri.
Uwabanze izi nshingano ni Madame Louise Mushikiwabo, akurikirwa na Dr Richard Sezibera, hakurikiraho Dr Vincent Biruta bose bakaba bari ba Minisitiri.
Undi wahawe inshingano nshya ni Stephanie Nyombayire wagizwe Umuvugizi muri Perezidansi ya Repubulika. Uyu asanzwe akora muri Perezidansi muri Serivisi y’Itangazamakuru.
Aba bombi imyanya bayihawe mu nama y’Abaminisitiri yo ku wa 30 Nyakanga 2021, yayobowe na Perezida wa Repubulika, Paul Kagame.
Ubwanditsi
