Ku wa 6 Mata 2019, Julie Payette, Guverineri Mukuru wa Canada n’itsinda ayobowe basuye Urwibutso rwa Jenoside yakorewe Abatutsi rwa Kigali ruri ku Gisozi, bunamira imibiri ihashyinguye y’abazize Jenoside yakorewe Abatutsi, bashyira n’indabo kumva iyo mibiri iruhukiyemo.
Lisa Stadelbauer, Ambasaderi wa Canada mu Rwanda ufite ikicaro muri Kenya, mu kiganiro kigufi n’itangazamakuru, yagize ati “Guverineri Mukuru wa Canada, Julie Payette n’itsinda ayoboye, turi hano ku butumire bwa Guverinoma y’u Rwanda, turi itsinda ririmo abayobozi banyuranye barimo n’abanyarwanda. Twaje gusura urwibutso no guha icyubahiro inzirakarenganye zihashyinguye zazize Jenoside yakorewe Abatutsi no kwifatanya mu bikorwa byo kwibuka.”
Mbere y’uko Julie Payette yurira indege yerekeza i Kigali, Minisitiri w’intebe wa Canada, Justin Trudeau, ku wa 1 Mata 2019 yari yatangaje ko Canada n’u Rwanda ari ibihugu bifitanye umubano utajegajega wubakiye ku kwiyemeza guteza imbere ihame ry’uburinganire n’ubwuzuzanye hagati y’uibitsina byombi, kurengera ibidukikije no kongera ubushobozi mu kubungabunga amahoro hirya no hindo ku Isi.
Yavuze ko uruzinduko rwa Guverineri Mukuru rushimangira ubucuti ibihugu byombi bifitanye kandi ari ukongera imbaraga mu gusangira indangagaciro n’intego rusange.
Julie Payette w’imyaka 55 ni Guverineri Mukuru wa 29 wa Canada, yahawe izi nshingano ku wa 2 Ukwakira 2017. Guverineri Mukuru ashyirwaho hagishijwe inama Minisitiri w’Intebe, agafatwa nk’uhagarariye Umwamikazi Elisabeth II ari na we mugaba w’Ikirenga w’Ingabo za Canada.
Julie Payette ari mu Rwanda kuva ku wa 5 Mata, we n’itsinda ayoboye bakazifatanya n’abanyarwanda mu Kwibuka ku nshuro ya 25 Jenoside yakorewe Abatutsi. Urugendo rwabo mu Rwanda rukazasozwa ku wa 8 Mata 2019.
Julie Payette, Guverineri Mukuru wa Canada yunamiye inzirakarengane zazize Jenoside yakorewe Abatutsi ziruhukiye mu Rwibutso rwa Jenoside yakorewe Abatutsi rwa Kigali ruri ku Gisozi (Ifoto/Panorama)
Rwanyange Rene Anthere
