Minisitiri w’intebe akaba na Minisitiri w’Ingabo wa Côte d’Ivoire, Hamed Bakayoko, yapfiriye mu bitaro byo mu Budage, nk’uko byatangajwe na Perezida w’iki Gihugu.
Nk’uko tubikesha BBC, Bakayoko, warimo avurwa kanseri, yapfuye ku wa gatatu, nyuma y’iminsi mike agize imyaka 56.
Mu kwezi kwa karindwi mu 2020 nibwo yagizwe Minisitiri w’intebe, nyuma y’urupfu rutunguranye rw’uwo yasimbuye Amadou Gon Coulibaly.
Perezida Alassane Ouattara yavuze ko Bakayoko yari “urugero ku bakiri bato n’umugabo w’intangarugero mu kwizerwa”.
Mu kwezi kwa kabiri, Bakayoko yajyanwe gusuzumwa mu Bufaransa, nyuma yoherezwa mu Budage kuko ubuzima bwe bwagendaga bumera nabi.
Uyu mugabo wahoze ari umushoramari mu itangazamakuru nyuma akaba umunyapolitiki, yakoze umurimo w’ubuhuza mu ntambara y’imbere muri Côte d’Ivoire yo kuva mu 2002.
Issiaka Sangare uvugira ishyaka ritavuga rumwe n’ubutegetsi Front Populaire Ivoirien (FPI), yabwiye ibiro ntaramakuru AFP ko Bakayoko yari “umuntu ukomeye muri politiki no kunga igihugu”.
Patrick Achi ni we wagizwe Minisitiri w’intebe w’agateganyo, mu gihe Téné Birahima Ouattara, murumuna wa perezida, yagizwe Minisitiri w’ingabo w’agateganyo.
