Padiri Dr Fidèle Dushimimana, Umuyobozi mukuru wungirije ushinzwe amasomo n’ubushakashatsi mu Ishuri rikuru Gatolika rya Kabgayi (ICK) riherereye mu karere ka Muhanga, yamuritse igitabo yise ‘Kura Ujya Ejuru’ gikubiyemo ubushakashatsi ku mikurire y’umwana. Iki gitabo yitezeho ubufasha ku Banyarwanda mu kumenya ibiranga umwana muri buri kigero cy’imikurire.
Nk’uko tubikesha Ikinyamakuru Kigali Today, uyu muhango wabaye mu mpera z’icyumweru gishize, witabirwa n’abayobozi mu nzego zinyuranye, abarimu muri Kaminuza, Abihayimana ndetse n’abashakashatsi banyuranye.
Padiri Dushimimana, yeretse abitabiriye uwo muhango ubufasha yiteze kuri icyo gitabo cye mu iterambere ry’imikurire myiza y’umwana, dore ko ari igitabo kivuga uko umwana akura mu gihagararo mu mitekerereze n’imibanire n’abandi.
Yagize ati “Iki gitabo kizafasha abasomyi kumenya ibiranga umwana muri buri kigero cy’imikurire, kumenya ibibazo ahura na byo mu mikurire ye n’icyo umwana yakorerwa ngo akure neza”.
Akomeza agira ati “Ni igitabo gikubiyemo ibisubizo bicukumbuye ku mikurire y’umwana, uruhare rw’imirerere n’imibanire y’ababyeyi ku mikurire n’imitekerereze y’abana”.
Yagarutse ku mpamvu yamuteye kwandika icyo gitabo, avuga ko igitekerezo cyaturutse ku biganiro yagiye atanga mu mashuri abanza n’ayisumbuye, byavugaga ku mikurire y’umwana.
Avuga ko ibisubizo by’abana ku bibazo yajyaga ababaza, byamugaragarije inyota bafite yo kumenya umwana n’imikurire ye, kugira ngo babashe kumurera neza.
Ubu ubushakashatsi bwashimishije cyane abitabiriye uwo muhango, by’umwihariko Umuyobozi w’Akarere ka Muhanga Jacqueline Kayitare, wavuze ko icyo gitabo kizafasha abaturage mu guteza imbere imikurire y’abana babo, dore ko ngo inshuro nyinshi ababyeyi bashyira imbaraga mu bijyanye n’imirire, bakibagirwa ko n’imikurire y’ubwonko ari ingenzi.
Ati “Usanga igisubizo gishakirwa mu mata no muri shishakibondo gusa, ariko ikijyanye n’ubumenyi n’imfashanyigisho yafasha imitekerereze y’umwana, imyumvire n’imibanire ye n’abandi hakabamo icyuho. Akenshi turebera ku bigaragara, kandi hari n’ibitagaragara byakwangiza imikurire y’umwana mu gihe bititaweho”.
Padiri Ntivuguruzwa Balthazar, Umuyobozi mukuru wa ICK, na we yashimye igitabo Kura Ujya Ejuru. Yagize ati “Iki gitabo gikubiyemo ubushakashatsi buzadufasha kubonera ibisubizo ibibazo by’ingutu bibangamiye uburezi”.
Ibyimanikora Yves Christian
