RUKUNDO Eroge
Perezida wa Repubulika y’u Rwanda, Paul Kagame, yaburiye amahanga adahangana n’abapfobya banafite ingengabitekerezo ya Jenoside ihera ku macakubiri, ishobora gutuma habaho indi Jenoside.
Ibi yabigarutseho ku wa 07 Mata 2024 ubwo ku rwego rw’Igihugu hatangizwa icyumweu cy’icyunamo n’iminsi 100 yo kwibuka Jenoside yakorewe Abatutsi mu 1994 aho n’isi yose yifatanya n’u Rwanda kuri uyu mu munsi.
Perezida Kagame agira ati “Mu 1994 Abatutsi bose bagombaga gupfa. Mu gihe abasirikare bakoze Jenoside bahungiye muri Congo bashakaga kugaruka mu Rwanda nyuma y’imyaka itanu badashaka abarokotse gusa bashaka n’abandi Banyarwanda banze ko bajyana mu buhungiro aribo bazwi ubu nka FDLR. Bamwe barabirengagiza kubera inyungu zitavugwa ariko hano mu Rwanda hari ibihumbi by’Abanyekongo b’Abatutsi b’impunzi.”
Akomeza agira ati “Tubona benshi barimo n’ibihugu by’Afurika byivanga muri ibyo bibazo. Ni iki gishobora kutubaho? Iyi ni yo si twifuza? Uyu ni umuburo. Inzira zose z’amacakubiri zishobora gutuma Jenoside iba ahandi aho ariho hose ku isi niba tutabyitayeho. Tugiye mu mateka abarokotse ubwicanyi bw’indengakamere buri gihe bahora bategerejweho guceceka, ubuhamya bwabo ni ibimenyetso bigenda.”
Ati “Icyo dushaka ni ugushyira hamwe n’ubufatanye, buri gihe tuzahora dushyira imbaraga nyishi mu kurwanya ibitera Jenoside nubwo twaba turi twenyine.”
Perezida Kagame yakomeje agira ati “Hari amasoma atatu twize ariyo; Twe nk’Abanyarwanda n’abany’Afurika, nitwe dushobora guha agaciro ubuzima bwacu uko bikwiye, kudategereza uruhushya rwo gutabara aho rukomeye no kurinda abaturage ndetse no kudashyigikira politiki igamije kugira abaturage iheza.”
Insanganyamatsiko yo kwibuka Jenoside yakorerwe Abatutsi mu 1994 kuri iyi nshuro iragira iti: “Kwibuka Twiyubaka”.
