Panorama Sports
Ku wa 29 Nzeri 2025, Urwego rw’Igihugu rw’Iterambere –RDB, rwatangaje ko Visit Rwanda yinjiye muri Siporo yo muri Leta Zunze Ubumwe za Amerika (USA), ikaba umuterankunga w’ikipe ya LA Clippers ikina muri NBA na Los Angeles Rams ikina muri NFL (National Football League).
RDB itangaza ko aya masezerano azafasha Visit Rwanda kwamamariza ubukerarugendo bw’u Rwanda ku bibuga bitatu ari byo SoFi Stadium, Hollywood Park na Intuit Dome biherereye mu mujyi wa Inglewood muri Leta ya California, imwe mu zigize USA.
U Rwanda rushaka kwinjiriza nibura miliyari imwe y’Amadolari ya Amerika mu rwego rw’ubukerarugendo mu mwaka wa 2029. Ubufatanye n’amakipe nka LA Clippers na Los Angeles Rams bwitezweho umusanzu ukomeye mu gufasha iki gihugu kugera kuri iyi ntego.
LA Clippers
LA Clippers ni ikipe ya Basketball ibarizwa mu mujyi wa Los Angeles, muri Leta ya California. Ikinira mu gice cyo mu burengerazuba (Western Conference) hamwe n’amakipe nka Los Angeles Lakers, Golden State Warriors, Sacramento Kings na Phoenix Suns.
Iyi kipe yashinzwe mu 1970 yabanje kwitwa Buffalo Braves, iza kwimukira i San Diego mu 1978, ihinduka San Diego Clippers. Mu 1984, yimukiye muri Los Angeles, ari bwo yiswe LA Clippers.
LA Clippers yamamaye cyane mu myaka ya za 2000 no mu ya 2010 ubwo yarimo abakinnyi bakomeye nka Blake Griffin, Chris Paul la DeAndre Jordan bazanye ibihe byamenyekanye nka ‘Lob City’. Muri ibyo bihe, iyi kipe yageze kenshi mu mikino ya kamarampaka (Playoffs).
Ubuyobozi bw’iyi kipe bwagize uruhare rukomeye mu iterambere ryayo. Mu 2014, Steve Ballmer wahoze ayobora Microsoft yayiguze miliyari ebyiri z’Amadolari ya Amerika nyuma y’aho Donald Sterling, wari nyirayo, ahagaritswe burundu mu irushanwa rya NBA.
Ubuyobozi bushya bwa Ballmer bwahaye ikipe icyerekezo gishya, igira imbaraga mu rwego rw’ibikorwa, ininjiza amafaranga menshi; ibyatumye igira ubushobozi bwo guhatana n’andi makipe yo muri NBA.
Mu 2019, Clippers yaguze abakinnyi b’ibirangirire: Kawhi Leonard na Paul George, bigaragara ko uko byagenda kose ishaka igikombe. Mu 2021, bwa mbere mu mateka yayo, yageze mu mikino ya nyuma ya Western Conference. Forbes itangaza ko mu 2024, iyi kipe ifite agaciro ka miliyari 5,5$.
Kuva mu mwaka w’imikino wa 2024-2025, LA Clippers yakirira imikino kuri Arena yayo ya ‘Intuit Dome’. Mbere yasangiraga ikibuga cya ‘Crypto.com Arena’ n’andi makipe y’i Los Angeles arimo Lakers.
LA Rams (Los Angeles Rams)
Los Angeles Rams ni imwe mu makipe 32 akina muri Shampiyona ya National National Football League (NFL) yo muri Leta Zunze Ubumwe za Amerika. Ibarizwa mu Mujyi wa Los Angeles muri Leta ya California. Ibarizwa muri Divisiyo y’u Burengerazuba bwa Amerika izwi nka National Football Conference.
Yashinzwe mu 1936, mu Mujyi wa Cleveland muri Leta ya Ohio kugeza mu 1945. Icyo gihe yitwaga Cleveland Rams, nyuma iza kwimurirwa muri Los Angeles, hagati ya 1946 na 1994. Icyo gihe yabaye ikipe ya mbere yinjije Abanyamerika bafite inkomoko muri Afurika bwa mbere.
Nyuma iyi kipe yavuye muri uyu mujyi yimukira mu wa St. Louis yo muri Leta ya Missouri kuva 1995 kugeza 2015 yitwa St. Louis Rams, ariko iza kugarurwa i Los Angeles mu 2016 kugeza ubu.
Los Angeles Rams yakirira imikino yayo ya kuri SoFi Stadium imwe muri sitade nini zibarizwa mu Mujyi wa Inglewood uri hafi y’Umujyi wa Los Angeles.
Ni sitade yakiriraho kandi na Los Angeles Chargers na yo ibarizwa muri NFL. Buri kipe igira umunsi wawo, sitade igatakwa hashingiye ku ikipe igiye gukina.
Los Angeles Rams yambara imyenda y’ubururu, umuhondo ushashagirana n’umweru, ikagira ikirango cy’umwana w’intama. Ifite agaciro ka miliyari 6,9$ nk’uko imibare ya Forbes yo mu 2024 ibigaragaza.
Mu yatwaye ibikombe bya NFL inshuro ebyiri, ibizwi nka ‘Super Bowl’ umukino uruta indi uhuza ikipe yitwaye neza hagati ya Diviziyo izwi nka American Football Conference iba igizwe n’amakipe 16 na National Football Conference.
Super Bowl ya mbere Los Angeles Rams yayegukanye mu 1999 yari ikibarizwa i Saint Louis. Yatsinze Tennessee Titans yo muri Divisiyo ya American Football Conference, ibitego 23 kuri 16
Indi Super Bowl Los Angeles Rams yegukanye ni iyo mu 2021, ubwo yari yaragarutse i Los Angeles. Icyo gihe yatsinze Cincinnati Bengals, ibitego 23 kuri 20
Los Angeles Rams ni iy’umuherwe witwa Stan Kroenke usanzwe afite imigabane muri Arsenal. Ubu itozwa na Sean McVay. Mu 2022 ni we wabaye umukinnyi muto watwaye Super Bowl ku myaka 36.
