Perezida Paul Kagame yongeye kwibutsa abatuye Afurika ko nibadakora ngo bave mu bukene, ntawe uzabibakorera.
Yibaza impamvu kuva ubukoloni bwahagarikwa mu myaka irenga 60 ishize, Abanyafurika n’Abanyarwanda muri rusange baba bagikennye bategereje inkunga y’imiryango itegamiye kuri Leta.
Yaraye ahaye ikiganiro abitabiriye Ihuriro rya 18 ry’Umuryango Unity Club Intwararumuri avuga ko nta muntu wasabirije ngo bimukize.
Kagame yashakaga kubabwira ko igikwiye ari ukureba niba ubukene ari ikintu abantu bagomba kumenyera, bakabana nacyo(entitled) cyangwa se bagakora bagakira nk’uko n’andi mahanga yakize.
Ati: “Nimumbwire mu bice by’isi byose muzi, mumpe urugero rw’igihugu abantu bakijijwe n’imiryango itari iya Leta? Cyangwa se hari uwakijijwe no gusabiriza kandi ukabona gusabiriza ntacyo bimuteyeho isoni. Kandi n’uwo usaba ukamureba igitsure nk’aho hari icyo agomba kukwishyura! Ibyo abayobozi twicaye hano tubyumva gute? Tubisobanura gute? Icyo kibazo tugakora tugishakira umuti n’ibi byose tuvuga, dukora cyangwa tuganira bikaba amagambo gusa.”
Perezida Kagame yavuze ko Abanyarwanda n’Abanyafurika muri rusange, bagomba gushaka umuti w’ibibazo bituma basigara inyuma.
Kuri we, iki ni ikibazo kigomba gushakirwa umuti byanze bikunze kuko niba abantu bahora bavuga ko bashaka kubaho neza, bashaka gutera imbere, ni ngombwa ko babiharanira.
Ni ibintu avuga ko bigomba gukorerwa, umuntu agaharanira ko uko ibintu byahoze mu myaka 50, 60, 70 kuzamura, bihinduka.
Ati: “Niba ari byo, bikorere kandi birashoboka, wabigeraho. Ariko umuntu yibaza impamvu nyuma y’imyaka 50, twaba tukiri aho dusabiriza”.
Indi ngingo yagarutseho ni ibyerekeye amasezerano u Rwanda rusinyana na Repubulika Iharanira Demukarasi ya Congo akemeza ko ari mo uburiganya.
Ati: “Ibyo by’amasezerano birimo uburiganya bwinshi. Ibyo dukora, tuvuga, uko tubana n’abandi kandi turwana n’abandi kandi twaciye umurongo kera. Ni ukuvuga ngo igihugungabanya u Rwanda cyo ntabwo twacyihanganira.”
Avuga ko Abanyarwanda biyemeje kubaho byanze bikunze ndetse bibaye ngombwa babipfira kugira ngo abasigaye babeho neza.
Avuga ko abantu bagomba kumva ko kubaho kwabo ari inshingano n’uburenganzira byabo, bakareka guhora bateze amaso abandi bibwira ko abo ari bo bazabashakira amaramuko.
Mbere y o kugeza ijambo ku bari aho, hari abandi bayobozi batanze ibiganiro, bagaruka ku bumwe bw’Abanyarwanda bushingiye no kuri Ndi Umunyarwanda nk’igitekerezo-ngenga kiranga ubuzima bw’Abanyarwanda.
