Ikipe ya RSSB Tigers ikomeje kwigaragaza neza mu irushanwa rya Basketball Africa League (BAL), nyuma yo gutsinda Johannesburg Giants amanota 102 kuri 89, mu mukino wayo wa gatatu wa Conference ya Kalahari.
Uyu mukino wabereye i Pretoria muri Afurika y’Epfo ku mugoroba wo ku wa Gatatu, aho RSSB Tigers yongeye kwerekana urwego iriho nyuma yo gutsinda imikino ibiri ibanza yari yayihuje na Al Ahly yo muri Libya ndetse na Petro Atlético yo muri Angola.
Kuva umukino utangiye, RSSB Tigers yagaragaje imbaraga nyinshi, yegukana agace ka mbere ku manota 28 kuri 18. Yakomeje uwo muvuduko no mu gace ka kabiri, igatsinda amanota 25 kuri 24, mbere yo kongera gutsinda agace ka gatatu ku manota 24 kuri 20.
Nubwo mu gace ka nyuma Johannesburg Giants yagerageje kugaruka mu mukino, igatsinda amanota 27 kuri 25 ya RSSB Tigers, ntibyabujije iyi kipe yo mu Rwanda kwegukana intsinzi muri rusange n’amanota 102 kuri 89.
Iyi ntsinzi yahise ituma RSSB Tigers ibona itike yo kuzakina imikino ya nyuma ya BAL (Playoffs), izabera i Kigali muri BK Arena mu kwezi kwa Gicurasi 2026.
Kugeza ubu, RSSB Tigers ni yo iyoboye urutonde rw’amakipe ari guhatana muri Conference ya Kalahari, ibintu biyishyira mu myanya myiza yo gukomeza neza muri iri rushanwa rihuza amakipe akomeye ku mugabane wa Afurika.
RSSB Tigers ikomeje kwandika amateka mu mikino ya BAL
