Panorama Sports
Umufaransakazi Celia, ni we wegukanye umwanya wa mbere mu isiganwa ry’amagare ku Isi mu bagore batarengeje imyaka 23 y’amavuko, basiganwa mu muhanda.
Kuri uyu wa Kane tariki ya 25 Nzeri 2025, ni umunsi wa gatanu wa Shampiyona y’isi y’umukino wo gusiganwa ku magare. Abakobwa batarengeje imyaka 23 y’amavuko ni bo bakinnye, basiganwa mu muhanda mu kivunge. Basiganwe ku ntera ya Kilometero 119 na Metero 300.
Abasiganwa bari 80 baturutse mu bihugu 40. Batangiriye kuri Kigali Convention Center ni naho basoreje isiganwa.
Isiganwa ryaranzwe no kuzenguruka bimwe mu bice bya Kigali birimo Kimihurura, Remera (Nyarutarama), bakanyura muri Golf, bagakomeza Kacyiru, bakamanuka Kimihurura, bakanyura Mediheal, bakazamuka mu muhanda w’amapave wa Kimihurura bagatunguka ku rwego rw’Umuvunyi, hanyuma bagasoreza kuri Kigali Convention Center. Ibi byakoze incuro umunani. Abanyarwandakazi barimo Nyirarukundo Claudette, Iragena Charlotte na Mwamikazi Jamilla bari mu bavuyemo isiganwa ritararangira.
Saa Kumi n’iminota 35, ni bwo Umufansakazi Célia Gery yageze ku murongo ari uwa mbere akoresheje amasaha 3 n’iminota 24 n’amasegonga 26. Yakurikiwe n’umunya-Slovekia, Viktoria Chladonova warushijwe amasegonga abiri gusa. Umwanya Gatatu yabaye umunya-Espagne, Paula Blasi Clairol, wasizwe amasegonda 12.
Iri siganwa ry’Abagore batarengeje imyaka 23 basiganwa mu kivunge mu muhanda, ni ubwa mbere ribaye muri Shampiyona y’isi y’Amagare. Ibi bivuze ko u Rwanda rwanditse amateka kuko ni ho iri rushanwa ryatangiriye mu mateka y’Isi mu mukino w’amagare.
Célia Grey yahawe umudari wa Zahabu, isaha yo mu bwoko bwa Tissot, urwibutso rw’icyana cy’ingagi. Hatangiye abakinnyi 85 ariko hashoboye gusoza 35 gusa abandi bagiye bavamo kubera ko bagiye bafatirwaho mu nzira batarazenguruka.
