Munezero Jeanne d’Arc
Umurenge wa Masaka uza ku isonga mu karere ka Kicukiro, mu kesa umuhigo wo kwishyurira mituweli ku gihe.
Kuba uyu murenge ari wo wabaye uwa mbere si uko ari wo murenge ukize mu mirenge yose igize aka karere, ahubwo bisaba ubufatanye nu bwitange ndetse no gushyira hamwe.
Ibi byagarutsweho na bamwe mu bari baje kwizihiza ibirori bya bereye mu kagari ka Gataraga, aho abaturage n’abafatanyabikorwa batandukanye babafashije kwesa uyu muhigo.
Ubuhamya bwa bamwe mu baturage babashije kugobokwa na mituweli ubwo babaga bageze mu kaga bityo bakaba bashishikariza bagenzi babo kujya bayitanga kandi ku gihe batagoranye na bayobozi kuko ari inyungu zabo
Niyonsaba Clemantina ufite umuryango w’abana 10, yemeza ko Mituweli yamugobotse. Agira ati “Bajyaga bambwira gutanga mituweli sibyiteho cyane ko ntajyaga numva akamaro kayo, nkavuga ngo nirwara leta izamvuza, ariko umunsi umwe narwaje abana ku buryo bukomeye mbura uko mbigenza. Byageze aho umwana andembana kubera kutamujyana kwa muganga, kuko nta Mituweli narimfite. Mujyanye ku kigonderabuzi banca amafaranga ndayabura umwana yari amfanye…”
Akomeza agira ati “Naje kubona umugiraneza arayingurira nibwo abana banjye bavuwe ariko umwe yari apfanye Imana iratabara. Kuva ubwo nahinduye imyumvire ntangira kujya nyigura ariko bingoye, kuko umuryango wari umaze kugera kuri benshi, ariko ndabikora kuko nabonye isomo bityo ndashishikariza n’abandi kujya bagira bimwe bigomwa bakabanza kuyigura, kuko iyo urwaye nibwo ubibona.”
Umuyobozi w’ishami ry’ubuzima mu karere ka Kicukiro, Karungi Rebecca, na we ashimira cyane uyu murenge kuko ubafasha cyane. Avuga ko uyu murenge ari uwa kabari mu kugira abaturage benshi kandi bubahiriza kugurira mituweli ku gihe bityo anasaba ko n’indi mirenge yajya ibigiraho.
Agira ati “Uyu murenge uradufasha cyane ku bijyanye na mituweli kandi atari uko ari wo murenge dufite mu karere ukize cyane, ahubwo ni uko baba babigize ibabyo bakabishyiramo imbaraga. Turasaba n’abandi bayobozi b’imirenge kujya bashyiramo imbaraga, bashishikariza abaturage kuyigura kare. bazirikana ko iyi gahunda yaje kugira ngo ifashe abanyarwanda mu bijyanye no kwivuza ndetse no kumenya guteganyiriza ejo hazaza; kuko dufite imiryango myinshi idafite uburyo burambye bwo kwizigamira ndetse batanafite uburyo bakwivuzamo. Rero kuba twishyura mituweli ni ukugira ngo twese tubashe kubona ubuvuzi uko bikwiye kandiduhshyize hamwe haba abishoboye n’abatishoboye.”
Akomeza agira ati “Abaturage rero bakwiye kujya babyitabira kuko ni ingirakamaro kugira ngo serivise z’ubuzima mu kwivuza zigere kuri buri wese ku buryo bwihuse, ni uko tugomba kwitabira kwishyura mituweli.”
Umunyamabanga Nshingabikorwa w’Umurenge wa Masaka, Nduwayezu Alfred, ashimira abaturage babafashije kwesa umuhigo wo gutanga mituweli, asaba n’abandi kujya babigira ibyabo bakabikora hakiri kare.
Agira ati “Dukora uko dushoboye tukibutsa abaturage bacu kugira ngo bajye bitabira gutanga ubwisungane mu kwivuza, kuko indwara ntiteguza. Turakorana n’amasibo n’amatsinda umuntu abibutsa kwishyira hamwe no kwishyura mituweli kare.”
Senateri Havugimana Emmaneul, na we wifatanyije n’abatuye Umurenge wa Masaka, agaruka ku byiza byo gutanga ubwisungane mu kwivuza “Mutuelle de Sante” akanibutsa ko buri wese akwiye kuyitanga kuko n’ubwo atarwara hari abandi ifasha.
Agira ati “Mituweli ni ubufatanye ntabwo dukwiye kugira imyumvire ngo narayishyuye umwaka ushize none warangiye ntarwaye… Ushobora kuba utararwaye ariko wavuje abandi kuko nawe uramutse urwaye abandi na bo barakuvuza. Ntabwo wari ukwiye kwireba ho gusa, ahubwo wari ukwiye kumva inyungu zirimo kugira ngo utange mituweli ubashe gufasha n’abandi kugira ngo buri wese agire ubuzima bwiza.”
Masaka ni umwe mu mirenge 10 igize Akarere ka Kicukiro, ugizwe n’utugari 6, kandi twose twaje mu myanya ya mbere twiza mu kwishyura Mituweli neza mu mwaka wa 2025-2026 mu karere kose kagizwe n’utugari 41.
