Ingabo z’u Rwanda -RDF na Polisi y’u Rwanda -RNP, mu itangazo bashyize ahagaragara bavuga ko bagiye gutangiza ibikorwa byihariye bigamije gufasha abaturage mu mibereho myiza n’iterambere rirambye mu gihugu.
Ibi bikorwa biteganyijwe gutangira ku wa mbere tariki ya 9 Werurwe 2026, bikaba biri mu rwego rw’ubufatanye bw’izo nzego mu bikorwa byiswe “Ubufatanye bw’Abaturage, Ingabo na Polisi by’u Rwanda mu bikorwa byo kwihutisha Kwibohora32.”
Ibi byatangajwe mu itangazo rigenewe abanyamakuru ryashyizwe ahagaragara ku wa 6 Werurwe 2026 i Kigali. Muri iri tangazo, hagaragaramo ko ibi bikorwa bigamije guteza imbere imibereho myiza y’abaturage, by’umwihariko mu gihe u Rwanda rwitegura kwizihiza ku nshuro ya 32 umunsi wo Kwibohora uteganyijwe tariki ya 4 Nyakanga.
Nk’uko bigaragara muri iri tangazo, Ingabo na Polisi by’u Rwanda bizifatanya n’abaturage mu bikorwa bitandukanye by’iterambere rusange. Muri byo harimo kubaka inzu z’abatishoboye, kubaka ibyumba by’amashuri, gukwirakwiza amazi meza, kubaka ibiraro, ndetse no gukora imirimo yo kubungabunga ibidukikije n’ibindi bikorwa bigamije guteza imbere imibereho y’abaturage.
Ubuyobozi bw’Ingabo na Polisi by’u Rwanda bwagaragaje ko ibi bikorwa ari kimwe mu bimenyetso by’imikoranire myiza iri hagati y’inzego z’umutekano n’abaturage, bikaba binagaragaza uruhare rukomeye izo nzego zigira mu guteza imbere imibereho myiza n’iterambere ry’igihugu.
Byongeye kandi, abaturage basabwe kuzakira neza ibi bikorwa no kubigiramo uruhare rugaragara, kuko bigamije kubungabunga umutekano ndetse no gukomeza guteza imbere u Rwanda mu buryo burambye.
Ingabo na Polisi by’u Rwanda bashishikarije abaturage gukomeza ubufatanye n’inzego z’umutekano mu bikorwa byose bigamije iterambere n’umutekano by’igihugu.
